Siyasət

"Artıq düşmənin xırda bir təxribatına da sərt cavab verilməlidir" - Polkovnik

3 May 2021 14:25
Baxış: 1 774

"Prezident İlham Əliyevin hər bir kəlməsi strateji səviyyədə qoyulmuş tapşırıqdır. Bu mesajlar bütün qurumlar tərəfindən də eyni şəkildə nəzərə alınmalıdır".

Bunu Milli.Az-a açıqlamasında hərbi ekspert, ehtiyatda olan polkovnik Ruslan İmamquliyev deyib.

Polkovnik bildirib ki, Prezidentin Cəbrayıldakı məlum mesajından sonra düşmənin istənilən təxribatına sərt cavab verilməlidir:

"Prezidentin bu mesajı ilə artıq qurumlar da gərəkli tapşırığı alıblar. Təbii ki, bundan sonra bu şəkildə ən adi, xırda təxribata qarşı anında cavab verilməlidir və veriləcəkdir. Hətta deyərdim ki, onların bu cür müxtəlif bəhanələrlə hər hansı bir sərhəd pozma halları olsa belə, bizim sərhədlərimizdə xidmət göstərən əsgərlərimizə qarşı hər hansı bir atışma halı olmasa belə mütləq şəkildə sərt cavab verilməli idi. Düşünürəm ki, cənab Prezidentin artıq bu mesajı qeyd etməsi o deməkdir ki, adekvat cavab verilməli idi və bundan sonra da gərəkli addımlar atılacaq. Əgər ən kiçik təxribatın belə qarşısı alınmazsa, bu cür hallar adiləşər. Ona görə mütləqdir ki, biz kimliyindən asılı olmayaraq, hətta mülki şəxs belə olsa, bizim hərbi qulluqçumuza təxribat törədilirsə, gözə-göz, qaşa-qaş qətiyyətlə düşmənə layiq olduğunu göstərək".

Xatırladaq ki, təxminən iki həftə əvvəl ermənilər Zəngilan və Qubadli istiqamətində atəşkəsi pozdular. Lakin Rusiyanin xahişi ilə qarşı tərəfə cavab atəşi açmadıq. Prezident İlham Əliyev isə Cəbrayılda sərhəd zastavasının açılışı zamani "Bu yaxınlarda Azərbaycan-Ermənistan sərhədinin Zəngilan istiqamətində bizim sərhədçilərimizə qarşı edilən hərbi təxribat sonuncu belə cəhd olmalıdır. Biz təmkinlik göstərərək bu təxribata cavab vermədik. Amma bu, sonuncu xəbərdarlıqdır. Əgər bir daha buna oxşar cəhd göstərilərsə, düşmən yerindəcə məhv ediləcək" dedi. 

Qeyd edək ki, dünəndən etibarən sosial şəbəkələrdə Azərbaycan Ermənistan sərhədində delimitasiya zamanı yaşanan hadisənin video-görüntüləri yayılıb. Görüntülərdə erməni zabiti Azərbaycan tərəfinə keçməyə çalışır. Dövlət Sərhəd Xidmətinin zabit və əsgərləri ona təmkinlə mane olmağa çalışarkən, erməni zabit sözügedən ərazinin onlara aid olduğunu iddia edərək irəliləməyə çalışıb. Hadisənin Azərbaycan-Ermənistan sərhədinin Sünix vilayəti ilə həmsərhəd hissəsində baş verdiyi bildirilir.

Təhməz Əsədov
Milli.Az

 

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.