"Asiya İnkişaf Bankının Azərbaycanla əməkdaşlığı digər qurumlardan fərqlənir"

Azərbaycanın maliyyə vəsaitləri artdıqca, özümüzün maliyyə ehtiyatları yarandıqca beynəlxalq maliyyə qurumları ilə əməkdaşlıq tamamilə yeni bir forma almağa başlayıb.

Bunu Milli.Az-a iqtisadçı-ekspert Pərviz Heydərov Asiya İnkişaf Bankının təşəbbüsü ilə Prezident İlham Əliyevlə bu bankın rəhbərləri arasında videokonfransı şərh edərkən deyib.

"Azərbaycan höküməti demək olar ki, dünyanın bütün beynəlxalq maliyyə qurumları, təşkilatları ilə əməkdaşlıq edir və bu əməkdaşlığa dövlət başçımız çox böyük önəm, əhəmiyyət verir. Həmin maliyyə qurumları ilə Azərbaycanın əməkdaşlığının çox böyük əhəmiyyəti və nəticələri var və bu, zaman etibari ilə özünü müxtəlif xarakterdə göstərir. Belə ki, vaxt var idi ki, biz həmin maliyyə qurumları ilə əməkdaşlıqda daha çox dost vəsaitlərinə ehtiyac duyurduq və bu, bilavasitə ölkədə iqtisadi stabilliyə nail olmaq, müasir inkişaf etmək və sair baxımından, yəni hökümətin həyata keçirdiyi müvafiq daxili iqtisadi siyasətlə bağlı xarakterizə olunurdu. Amma getdikcə Azərbaycanın maliyyə vəsaitləri artdıqca, özümüzün maliyyə ehtiyatları yarandıqca həmin maliyyə qurumları ilə əməkdaşlıq tamamilə yeni bir forma almağa başladı. Yəni, artıq sözügedən qurumlar Azərbaycanla əməkdaşlıqda yeni istiqamətlər seçmək məcburiyyətində qaldı. Bu qurumlar içərisində Asiya İnkişaf Bankının xüsusi yeri var. Bunu dövlət başçımız videokonfransda da xüsusi olaraq qeyd etdi".

O bildirib ki, dövlət başçışımızın Cənub qaz dəhlizi layihəsi ilə əlaqədar buna ən birinci müsbət reaksiya verən maliyyə qurumunun məhz, Asiya İnkişaf Bankının olması nüansına toxunması bunu deməyə əsas verir.

"Halbuki ölkə başçısının da qeyd etdiyi kimi, söhbət Azərbaycan qazının Avropaya ixracından, yəni, Avropa üçün əhəmiyyətli bir məsələdən gedir. Amma Avropa bankları, hələ bu barədə düşündüyü zaman Asiya İnkişaf Bankı bu layihəyə dəstəyini göstərib və layihənin əhəmiyyətli olduğunu digər maliyyə qurumlarından fərqli olaraq birinci bəyan edib".

Ekspertin fikrincə, Asiya İnkişaf Bankının Azərbaycanda göstərdiyi fəaliyyət, maliyyələşdirdiyi bir çox sahə ölkəmizin gələcək inkişafı üçün xüsusilə böyük əhəmiyyət daşıyır.

"Videokonfransda da qeyd olunduğu kimi, Asiya İnkişaf Bankı aqrar sektorun inkişafı ilə bağlı məsələlərdən tutmuş, yol tikintisi, o cümlədən nəqliyyat və bir sıra çoxsaylı infrastruktur layihələrinin dəstəklənməsi, hətta, elektrik enerjisinin istehsalına qədər, yəni, ölkənin enerji təhlükəsizliyi ilə bağlı da bir sıra layihələrdə Azərbaycanla əməkdaşlıq edir və bu sahədə müvafiq layihələrin həyata keçirilməsində yaxından iştirak edir. Bu mənada Asiya İnkişaf Bankının Azərbaycanla əlaqələri, əməkdaşlığı digər qurumlardan fərqli olaraq daha çox seçilir və elə dövlət başçımız da bu banka öz məmnunluğunu açıq şəkildə videokonfrans zamanı bildirib".

Qeyd edək ki, iyunun 1-də Asiya İnkişaf Bankının təşəbbüsü ilə Azərbaycan Prezidenti İlham Əliyevlə bankın prezidenti Masatsuqu Asakava, vitse-prezidenti Şiksin Çen və bankın rəhbərliyinin digər nümayəndələri arasında videokonfrans keçirilib.

Bəxtiyar Umarlı
Milli.Az