Siyasət

Əli Əhmədov: "Azərbaycan hökuməti gənclərin bu günü və gələcəyi uğrunda böyük işlər görür"

24 Avqust 2019 13:29

Baxış: 896

#SİYASƏT

Biz gənclərimizə böyük inamla yanaşırıq, Azərbaycan hökuməti gənclərin bu günü və gələcəyi uğrunda böyük işlər görməkdədir.

Milli.Az Trend-ə istinadən bildirir ki, bunu Baş nazirinin müavini, Yeni Azərbaycan Partiyasının Sədr müavini-İcra katibi Əli Əhmədov Masallı Olimpiya İdman Kompleksində gənclərlə görüşdə deyib.

Ə.Əhmədov vurğulayıb ki, Azərbaycan Prezidenti apardığı siyasətdə həmişə gənclərə önəm verir: "Bu təsadüfi deyil, gələcəyimiz gənclərlə bağlıdır. İstər dövlətimizin, istər cəmiyyətimizin, istər də partiyamızın gələcəyi gənclərlə bağlıdır. Ona görə də bu gün biz gənclərlə ciddi şəkildə işləyirik, müxtəlif tədbirlər keçiririk, onları daha da fəallaşdırırıq ki, Azərbaycanın gələcəyi etibarlı əllərdə olsun.

Məmmunluq hissi ilə qeyd etmək istəyirəm ki, Yeni Azərbaycan Partiyasının bir hissəsi gənclər birliyində birləşiblər və bununla da onlar Prezident İlham Əliyevin həyata keçirdiyi siyasəti dəstəkləyirlər, bu siyasətin həyata keçirilməsində yaxından iştirak edirlər".

Ə.Əhmədov qeyd edib ki, Azərbaycan gəncləri yaxşı təhsil almalıdır: "Biz istəyirik ki, Azərbaycan gəncləri yaxşı təhsil alsınlar, gözəl biliklərə yiyələnsinlər, Vətənimizin inkişafı naminə ləyaqətlə xidmət etsinlər. Eyni zamanda, istəyirik ki, gənclərimiz sağlam böyüsünlər, idmanla, bədən tərbiyəsi ilə məşğul olsunlar. Ona görə bu idman kompleksi gənclərin idmanla məşğul olmalarına hər cür şərait yaradır. Bizim bu layihənin məqsədi ondan ibarətdir ki, gənclərimiz öz istəklərinə uyğun olaraq ayrı-ayrı idman növləri ilə, bədən tərbiyəsi ilə məşğul olsunlar. Biz idman federasiyaları ilə birgə gənclərimizə bu imkanları təmin edəcəyik".

Milli.Az