Siyasət

Azərbaycan və Lesoto diplomatik münasibətlərə dair komunike imzaladılar

29 Sentyabr 2012 12:49

0 Şərh Baxış: 920

#AZERBAİJAN #LESOTHO

Sentyabrın 28-də Azərbaycanın xarici işlər naziri Elmar Məmmədyarov BMT Baş Assambleyasının 67-ci sessiyasında iştirakı çərçivəsində Lesotonun xarici işlər naziri Mohlabi Kennet Tsekoa ilə görüşüb.

Azərbaycan XİN-in mətbuat xidmətindən Trend-ə verilən məlumata görə, görüşdə Azərbaycan və Lesoto arasında diplomatik münasibətlərin təsis olunmasına dair komunike imzalanıb. Nazirlər ölkələrimiz arasında ikitərəfli münasibətlərin qurulmasının və inkişaf etdirilməsi ətrafında fikir mübadiləsi aparıblar. Nazir Elmar Məmmədyarov ikitərəfli münasibətlərin inkişafı üşün qarşılıqlı səfərlərin əhəmiyyətini qeyd edib və lesotolu həmkarını ölkəmizə səfərə dəvət edib. Dəvət məmnuniyyətlə qəbul olunub.

Həmçinin Nazir Elmar Məmmədyarov Azərbaycan Diplomatik Akademiyası haqqında məlumat verib, Lesoto diplomatlarını bu təhsil müəssisəsində təşkil olunan diplomatik kurslarda iştirak etməyə dəvət edib.

Sentyabrın 28-də Məmmədyarov BMT Baş Assambleyasının 67-ci sessiyasında iştirakı çərçivəsində İsrailin xarici işlər naziri Aviqdor Liberman ilə görüşüb.

Görüşdə Azərbaycan-İsrail ikitərəfli münasibətlərinin mövcud vəziyyəti və inkişaf perspektivləri ətrafında fikir mübadiləsi aparılıb. Münasibətlərin inkişafı üçün qarşılıqlı səfərlərin təşkil edilməsinin əhəmiyyəti vurğulanıb.

Milli.Az