Rusiya Bakını HƏDƏLƏDİ - Kreml Qarabağı işğal edəcəyinin MESAJINI VERDİ

Rusiya üçün İrəvan hər halı ilə Moskvaya Bakıdan bir neçə köynək daha yaxındır. Rusiya hakim elitasında belə bir fikir formalaşıb ki, Ermənistan olmasa, Rusiya da Cənubi Qafqazda mövcud olmayacaq. Bu səbəbdən Moskva İrəvanın hər kaprizinə dözmək məcburiyyətindədir. Kreml nə Ermənistandan imtina edəcək, nə də onu özündən küsdürəcək daha artıq addımlar atacaq.

Bu fikirlər Moskvada bir neçə gün öncə Sergey Lavrovla erməni həmkarı Ararat Mirzoyan arasındakı mətbuat konfransında da bir daha öz təsdiqini tapdı. Belə ki, Ermənistan xarici işlər naziri A.Mirzoyan növbəti dəfə ölkəmiz əleyhinə təxribatçı açıqlamaları ilə diqqət mərkəzinə düşdü. Doğrudur, Azərbaycan Xarici İşlər Nazirliyi Rusiya xarici işlər naziri Sergey Lavrovla Moskvada görüşən və ortaq mətbuat konfransında ölkəmiz əleyhinə təxribatçı açıqlamalar verən Mirzoyan barədə bəyanat yaydı, onun ağzının üstündən vurdu. Amma öyrəşmişə töbə yoxdur. 

Həmin mətbuat konfransında digər diqqət çəkən məqam Rusiya XİN rəhbərinin adı ilə bağlıdır. Sergey Lavrov Ararat Mirzoyan kimi olmasa da dolayısı ilə Azərbaycanı hədələyib. Konkret desək, Lavrov erməni həmkarlından geri qalmayıb. Rusiya XİN rəhbərinin Donbasla "Dağlıq Qarabağ" arasında paralellər apararaq azlıqların dil, mədəniyyət və digər hüquqlarının qorunması vacibliyini bildirməklə, rəsmi Bakıya mesaj göndərmək istəyib ki, əgər gələcəkdə Qarabağdakı etnik ermənilərin hüquqlarını tapdalayacaq hansısa bir neqativ addım görəcəyimiz təqdirdə Qarabağın dağlıq hissəsinin də taleyi Donbasın taleyini yaşayacaq. 

Görünür, Lavrov eyni zamanda bunu demək istəyib ki, Ukrayna Donbasa guya vəd etdiyi hüquqları vermədiyinə görə həmin bölgə Rusiyanın "ixtiyarına" keçib. Mirzoyan və digər erməni rəsmilərinin mövqeyi bəllidir. Sülh prosesinə əngəl olmaq üçün Ermənistan tərəfi bütün manipulyasiya imkanlarını işə salıb. 

Lakin ən narahatedici məqam və əsas təhlükə "hər yerdə Donbass" yaratmaq istəyən təfəkkür sahibi olan Moskvadır. Rusiya mümkün qədər Azərbaycanı təzyiq altında saxlamaq üçün erməni amilini bu zamana kimi istifadə etdiyi kimi bundan sonra da faydalanmaq niyyətindədir. Amma Moskva bilməlidir ki, öz ərazisində hansı hüquqlar əsasında, hansı qanunlar çərçivəsində addım atacağını Azərbaycan özü bilər. Azərbaycanın daxili işinə heç kimin qarışmaq ixtiyarı yoxdur. Necə ki, bunu rəsmi Bakı etmir. İstər Ermənistan, istərsə də onun havadarları anlamalıdırlar ki, Azərbaycan Ukrayna deyil.

Rusiya Fransa və İran kimi Azərbaycanın daxili işlərinə qarışmaqdansa, yaxşısı budur 10 noyabr üçtərəfli bəyanatı ilə üzərinə götürdüyü öhdəliklərə sadiq qalsın, bölgəyə yerləşdirilən sülhməramlı kontingentinə ona verilən səlahiyyətlərdən sui-istifadə edib, səlahiyyət çərçivəsini aşmasın, qeyri-qanuni işlərlə məşğul olmasın. Rusiya sülhməramlı kontingentinin müşayiəti ilə gizli yollarla Ermənistandan Qarabağa hərbi daşımaların həyata keçirilməsi üçtərəfli bəyanatın müddəalarının kobud şəkildə pozulmasıdır və bu qəbuledilməzdir. Moskva Azərbaycanın Rusiya hərbi kontingentinin bu özbaşınalığına göz yumacağını, görməzdən gələcəyini düşünürsə, yanılır. 

Təhməz Əsədov
Milli.Az