Siyasət

Bakının qərarı Ermənistan ilə Rusiyanı üz-üzə qoya bilər - İrəvan BƏDƏL ÖDƏYƏCƏK

1 Oktyabr 2022 11:06
Baxış: 4 253

"Ermənistanın iki ölkə arasındakı ziddiyyətləri beynəlmiləlləşdirmək cəhdi ilk növbədə danışıqlar prosesində Ermənistanın düşdüyü vəziyyətlə bağlıdır".

Bunu Milli.Az-a açıqlamasında Beynəlxalq Münasibətlərin Təhlili Mərkəzinin (BMTM) şöbə müdiri, politoloq Fuad Çıraqov deyib.

O bildirib ki, Bakının razılığı olmadan hər hanslı bir sülhməramlı qüvvənin Azərbaycanla sərhəddə yerləşdirilməsi mümkün deyil:

"Artıq Ermənistan görür ki, istər Brüssel formatı ilə, istər Moskva formartı ilə heçnəyə nail ola bilmir. Azərbaycan hər iki formatda diplomatik olaraq Ermənistanı dalana dirəyib. Buna görə də rəsmi irəvan danışıqlar prosesini pozmaq və münaqişəni beynəlmiləlləşdirmək üçün bu addımları atır. Format dəyişilərsə digər oyunçular  Ermənistana yardım edə bilər və əgər yeni formatlar yaranarsa, bu zaman Ermənistanın mövqeləri də yaxşı təmin oluna bilər. Görünən isə odur ki, Ermənistanın bu cəhdləri əbəs yerədir.

Ermənistan birtərəfli şəkildə öz ərazisində istənilən ölkənin silahlı qüvvələrini yerləşdirə bilər. Bu, onun suveren hüququdur. Bununla bağlı hesab edirəm ki, Azərbaycanın hər hansısa bir etirazı yoxdur. Bunun üçünsə ilk növbədə sərhədlərin delimitasiyası, demarkasiyası həyata keçirilməlidir ki, dəqiq bilinsin bu iki ölkənin sərhədləri haradadadır. 

Bu prosesdən sonra buna uyğun olaraq da Ermənistan öz sərhədlərində hansı ölkənin sülhməramlılarını və yaxud da ki, silahlı qüvvələrini nəzarət üçün yerləşdirmək istəyirsə, özü bilər. Bu, həm də Ermənistanın acizliyini göstərir ki, o öz sərhədlərini suveren, müstəqil dövlət kimi qoruya bilmir. 

Azərbaycan-Ermənistan sərhəddində Ermənistanın birtərəfli şəkildə istəyi ilə sülhməramlılar deyil, yalnız Ermənistan tərəfindən hansısa bir ölkənin silahlı qüvvələri yerləşdirilə bilər. Bununla bağlı onlar hansısa bir sülhməramlı mandata sahib olmayacaqlar. Çünki həmin o qüvvələrin sülhməramlı mandatı alması üçün eyni zamanda Azərbaycanın razılığı olmalıdır. Azərbaycan isə bununla bağlı hər hansı bir razılıq və yaxud mövqe ortaya qoymayıb. Azərbaycan özü öz sərhədlərini müstəqil şəkildə qoruya bilir. 

Ermənistanın başqa bir dövlətin ordusunu sərhədlərini qorumaq üçün dəvət etməsi məsələsinə Rusiyanın reaksiyası necə olacaqsa, bu, yenə də İrəvan və Moskva arasındakı münasibətlərə bağlıdır. İndiyənə qədər Ermənistan ərazisində Rusiya silahlı qüvvələri, hərbi bazası var idi. Ermənistanın İran və Türkiyə ilə sərhədlərini də Rusiya sülhməramlıları qoruyurdu. İndi bura üçüncü hər hansısa bir ölkənin silahlı qüvvələrinin gətirilməsi İrəvan-Moskva, əgər bu qoşun Fransanın silahlı qüvvələri olacaqsa, Parislə üçtərəfli münasibətlərinin mövzusudur".

Təhməz Əsədov
Milli.Az

 

Azernews Newspaper

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics