Sobada pambıq kimi antrikot resepti

Sobada pambıq kimi yumşalan, çölü xəfif qızarıb daxili şirəli qalan ət yeməkləri süfrələrin hər zaman ən seçilən təamlarındandır. Doğru marinad üsulu ilə hazırlanan bu qabırğa resepti hər bir təqdimata mükəmməl uyğunlaşır. Yanında soba tərəvəzləri, plov və ya təzə salatla servis edildikdə olduqca doyumcul bir əsas yeməyə çevrilir.

Milli.Az lazım olan məhsulları təqdim edir:

8 ədəd quzu və ya dana antrikotu

4 xörək qaşığı zeytun yağı

1 ədəd sürtgəcdən keçirilmiş baş soğan

3 diş əzilmiş sarımsaq

Marinad sosu və ədviyyatları:

1 su stəkanı soyuq süd

1 xörək qaşığı qatıq

1 tatlı qaşığı kəklikotu

1 çay qaşığı qara istiot

1 çay qaşığı qırmızı şirin toz bibər

Zövqə görə duz

İstəyə bağlı olaraq rozmarin

Hazırlanma qaydası
Qabörğanı geniş bir qaba yerləşdirin. Üzərinə sürtgəcdən keçirilmiş soğanı, əzilmiş sarımsağı, südü, qatığı, zeytun yağını və bütün ədviyyatları (kəklikotu, istiot, toz bibər, duz) əlavə edin.

Bütün materialları ətlərə yaxşıca yedirdərək masaj edin. Qabın üzərini streç filmlə bağlayıb, dadların bir-birinə hopması və ətin yumşalması üçün soyuducuda ən az 2 saat saxlayın.

Marinad olunmuş ətləri yağlı kağız sərilmiş soba listinə nizamla düzün.

Əvvəlcədən 190 dərəcə qızdırılmış sobada təxminən 35-40 dəqiqə nəzarətli şəkildə bişirin.

Bişmə prosesi zamanı ətlərin qurumaması üçün, listin dibinə çökən öz şirəsindən qaşıqla götürüb ara-sıra ətlərin üzərinə gəzdirin.

Bişməyinə son 5 dəqiqə qalmış sobanın yalnız üst qızdırıcı funksiyasını yandıraraq qabırğaların üzərinin xəfif qızarmasını təmin edin. Sobadan çıxardıqdan sonra əti kəsməzdən əvvəl 3-5 dəqiqə dincəldin və isti halda servis edin.

Marinad zamanı süd və qatığın tərkibindəki asidlər ətin liflərini parçalayaraq onun pambıq kimi olmasını təmin edir. Süd əvəzinə qatıq suyu və ya kefir də istifadə edə bilərsiniz.

Əti sobaya qoymazdan 10-15 dəqiqə əvvəl soyuducudan çıxarıb otaq temperaturuna gətirsəniz, hər tərəfi bərabər dərəcədə bişər.

Ətləri düzərkən aralarına xırda arpacıq soğanlar, rəngli bibərlər və ya kərə yağı parçaları qoysanız, yeməyin aroması daha da zənginləşəcək.

Bu möhtəşəm yeməyi kərə yağlı süzmə düyü plovu və ya sobada qızardılmış ədviyyatlı kartofla servis edə bilərsiniz. Yanında közlənmiş pomidor-bibər və mövsüm salatı ilə süfrəyə vizual rəng qatın. Təqdimat zamanı ətin üzərinə təzə kəklikotu budaqları qoymaq da əla ideyadır.

Nuş olsun!

Lalə Qüdrətova
Milli.Az