Makaron salatında mayonezi nə ilə əvəz etmək olar?

Makaron salatında mayonez əvəzinə qatıq, zeytun yağı və ya avokado kimi daha yüngül və sağlam alternativlərdən istifadə edilə bilər. Qatıq, xüsusilə süzmə qatıq seçildikdə həm lazımi qatılığı verir, həm də salata təravətli bir dad qatır. Zeytun yağı isə limon suyu və ya sirkə ilə birlikdə istifadə edildikdə sousun daha axıcı və aromatik olmasını təmin edir. Avokado isə əzilib istifadə edildikdə kremi xatırladan bir quruluş yaradır və mayonezə bənzər bir toxuma təqdim edərək salatı zənginləşdirir.

Milli.Az xəbər verir ki, qatıq mayonez əvəzinə ən çox üstünlük verilən variantlardan biridir. O, salata daha yüngül bir dad verir və kalori baxımından mayonezdən daha aşağıdır. Adi qatıq salatın sousunu bir az sulu edə bilər, ona görə də daha qatı bir tekstura üçün süzmə qatıq tövsiyə olunur. Zövqə görə içərisinə sarımsaq və ya müxtəlif ədviyyatlar əlavə edərək ləzzəti artıra bilərsiniz.

Süzmə qatıq və labne pendirini qarışdıraraq qaymaqlı (kremvari) bir alternativ əldə etmək mümkündür. Labne pendiri salata daha zəngin və yoğun bir qatılıq verir. Bu qarışım mayonezin verdiyi konsistensiyaya ən yaxın variantdır. Xüsusilə kremli salat sevənlər üçün həm təbii, həm də ideal bir seçimdir.

Zeytun yağı mayonezə sağlam bir alternativdir. O, təkbaşına və ya limon və ədviyyatlarla qarışdırılaraq istifadə oluna bilər. Bu üsul salatı daha yüngül edir. Mayonez kimi qatı bir struktur təmin etməsə də, salata çox xoş bir ətir qatır. Daha təbii və sadə dad axtaranlar, eləcə də veqan reseptlər üçün çox uyğundur.

Digər fərqli seçimlər
Kefir: Souslara qatılıq və təravət vermək üçün kefir də əlavə edilə bilər.

Humus: Noxud əsaslı humusdan istifadə edərək həm qidalandırıcı, həm də fərqli bir dad profili yaratmaq olar.

Qatıq və xardal: Mayonez istəməyənlər qatıq və xardal qarışığı ilə daha aromatik bir sous əldə edə bilərlər.

Lalə Qüdrətova
Milli.Az