İranda qızlar məktəbinə hücum: Ölənlərin sayı 150-yə çatdı

ABŞ və İsrailin İranın Hörmüzqan əyalətində yerləşən ibtidai qızlar məktəbinə endirdiyi zərbə nəticəsində həyatını itirən şagirdlərin sayı 150-yə çatıb. İran prezidenti Məsud Pezeşkian hadisəni "barbarlıq" və "tarixin qara səhifəsi" adlandırıb.

Milli.Az xəbər verir ki, İranın cənubunda, Hörmüzqan əyalətinin Minab şəhərində yerləşən "Şəcərətüt-Tayyibə Qız İbtidai Məktəbi" ABŞ və İsrailin birgə hava hücumlarının hədəfi olub. İran Xarici İşlər Nazirliyinin sözçüsü İsmayıl Bəqayi rəsmən təsdiqləyib ki, dağıntılar altından çıxarılan cəsədlərlə birlikdə ölənlərin sayı 150-yə yüksəlib.

İran Prezidenti Məsud Pezeşkian xalqa müraciət edərək hücumu şiddətlə qınayıb:

"Amerikalı və sionist təcavüzkarların mülki mərkəzlərə qarşı alçaqca hücumu nəticəsində onlarla günahsız şagirdin şəhid edilməsi bütün İran xalqının və azad insanların qəlbində dərin yaralar açmışdır. Bu barbarlıq aktı təcavüzkarların bu torpaqlara qarşı işlədiyi sayısız cinayətlərin qeydlərində daha bir qara səhifədir və millətimizin tarixi yaddaşından əsla silinməyəcək."

Müzakirə prosesinin davam etdiyi bir vaxtda, fevralın 28-i səhər saatlarında ABŞ və İsrail İrana qarşı genişmiqyaslı hərbi əməliyyata başlayıb:

Hədəf alınan şəhərlər: Tehran, İsfahan, Kərəc, Qum, Təbriz, Buşəhr, Kirmanşah və İlam.

ABŞ Prezidenti Donald Tramp İrana qarşı "böyük bir əməliyyat" başlatdıqlarını elan edib.

İsrail Müdafiə Nazirliyi hücumu "qabaqlayıcı zərbə" kimi qiymətləndirib. Ölkə boyu fövqəladə vəziyyət elan edilib, hava məkanı bağlanıb.

İran ordusu hücumlara cavab olaraq İsrailə qarşı onlarla ballistik raket və kamikadze dronlarla (PUA) əks-hücuma keçdiyini bildirib.

İran həmçinin Bəhreyn, BƏƏ, Küveyt, Qətər və İordaniyadakı ABŞ hərbi bazalarını hədəf alıb.

Bəhreyndə yerləşən ABŞ Hərbi Dəniz Donanmasının bazasının vurulduğu qeyd edilir.

Lalə Qüdrətova
Milli.Az