Maraqlı

Afrikadakı ən qədim insan qəbiri aşkar edilib

11 May 2021 21:55
Baxış: 630

Keniyadakı Panqa ya Səidi mağarasında aparılan qazıntılar zamanı arxeoloqlar orta daş dövrünə aid olan və təxminən, 78 min il yaşı olan qəbir çuxuru aşkar ediblər.

Milli.Az deyerler.org-a istinadən bildirir ki, bu, Afrika qitəsində indiyə qədər bilinən ən qədim insan qəbiridir.

Yazıda vurğulanır ki, alimlər ilk sümük parçalarını 2013-cü ildə tapıblar, ancaq yalnız 2017-ci ildə mağaranın indiki döşəməsinin üç metr aşağısında yuvarlaq boşluqlar və skelet qalıqları aşkar edilib. Qalıqların identifikasiyası üçün alimlərə bir ildən çox vaxt lazım gəlib. Araşdırma nəticəsində sümük qalıqlarının "Homo sapiens" uşağa - 2,5-3 yaşlı oğlana məxsus olduğu üzə çıxıb.

Meyit qəbirdə qıvrılmış vəziyyətdə, sağ tərəfi üstdə, dizləri sinəsinə sıxılmış vəziyyətdə olub. Sümüklərin və ətrafdakı torpağın mikroskopik analizi meyitin boşluğa yerləşdirildikdən sonra qısa zamanda basdırıldığını təsdiqləyib və bu da onu sürətli çürümədən qoruyub.

Alimlər qəbirlə eyni səviyyədə daş alətlər də tapıblar. Arxeoloqlar onları Afrika mezolitinə aid ediblər.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.