Zolaqlı geyimləri kombinləməyin 4 yolu

Zamansız bir üslub olan zolaqlı parçalar bu mövsüm yenidən dəbə qayıdır. Klassik zolaqlardan daha rəngli və qalın formalara qədər dəyişən bu trend düzgün seçimlərlə sizə diqqətçəkən bir görünüş bəxş edə bilər. Bəs zolaqlı geyimləri necə kombinləməli?

Milli.Az xəbər verir ki, zolaqlı geyimləri kombinləyərkən hər şeyi sadə saxlamaq məcburiyyətində deyilsiniz. İlk baxışdan uyğunsuz görünən parçaları bir araya gətirərək fərqli və maraqlı bir stil yarada bilərsiniz. Məsələn, zolaqlı bir şalvarı canlı rəngli bir bluzla geyinərək diqqəti bütöv görünüşünüzə yönəldə bilərsiniz. Yaz ab-havasını əks etdirən hasır çanta və aksessuarlarla kombininizi tamamlayaraq daha orijinal bir üslub əldə edə bilərsiniz.

Zolaqlı parçaları kombinləməyin ən rahat yolu, yenə eyni naxışdan istifadə etməkdir. Bunun sirri isə ziddiyyət yaratmaqdadır. Zolaqların istiqamətini və rəngləri dəyişdirərək üslubunuzu bir oyun meydanına çevirin. İncə və qalın zolaqları bir araya gətirərək dərinlik yarada bilər, yaxud eyni tonlarda geyinərək daha sakit və balanslı bir görünüş qazana bilərsiniz.

Əgər sadəliyi sevən birisinizsə, bu üsul tam sizə görədir. Zolaqlı parçanın diqqəti cəlb etməsinə icazə verin və qalan geyimlərinizi onun ətrafında formalaşdırın. Məsələn, rəngli zolaqlı bir şalvarı sadə ağ bir mayka ilə kombinləyərək təmiz və effektiv bir siluet yarada bilərsiniz. Aksessuarları da minimal seçərək görünüşünüzün bütövlüyünü qoruyun.

Zolaqlı geyimlər geyinmək, digər naxışlardan tamamilə imtina etmək demək deyil. Nöqtəli, damalı və ya çiçəkli naxışlarla zolaqlıları bir araya gətirmək ilk baxışda riskli görünə bilər, lakin düzgün seçimlə çox özgün bir tərz yaradır. Buradakı ən vacib qayda budur: naxışların bir-birini "boğmasına" icazə verməyin. Əgər naxışları eyni rəng palitrasında seçsəniz, onlar bir-biri ilə çox ahəngdar görünəcək.

Müəllif: Ülkər Vəliyeva (Milli.Az redaktor)