"Bitcoin" milyarderi ailə sərvətini oğrulardan qorumaq üçün inanılmaz tədbirlər görüb

Kriptovalyutalar gələcəyin pul vahidi ola bilər, lakin onları oğurluq riskinə qarşı qorumaq son dərəcə çətin bir vəzifədir. 

Milli.Az xəbər verir ki, "Bitcoin" sərvəti ilə tanınan bir ailənin gördüyü tədbirlər də bu vəziyyətin ən bariz sübutudur.

Əgər sərvət dəyərində kriptovalyuta ehtiyatınız varsa, pis niyyətli şəxslərin sizi qaçırıb təzyiq altında cüzdan şifrələrinizi öyrənməsi və bu vəsaitləri öz cüzdanlarına köçürməsi olduqca asan bir prosesə çevrilə bilər. Belə bir hadisədən sonra, nəinki oğurluğu sübut etmək, hətta canınızı qurtarmaq belə böyük şans tələb edir.

2016-cı ildə "Bitcoin"ə yatırım edərək böyük sərvət qazanan Taihuttu ailəsi, həmin vaxt təxminən 900 dollar olan "Bitcoin"in bu gün 110.000 dollar civarında olması ilə var-dövlət sahibi olub. Ailənin başçısı Didi Taihuttu indiki təhlükəli şəraitdə cüzdan şifrələrinin parçalarını fiziki olaraq müxtəlif qitələrdəki gizli sığınacaqlarda saxladığını bildirir. Taihuttu deyir: "Kiminsə məni silah gücü ilə məcbur etməsi halında belə, telefonumdakı cüzdandan daha artığını verə bilmərəm - o da çox deyil". O, bütün sərvətə tək məkandan çıxışın mümkün olmadığını vurğulayır.

Taihuttu əlavə edir ki, təhlükəsizlik kodları yalnız fiziki sığınacaqlarda deyil, eyni zamanda blokçeyn əsaslı şifrələmə xidmətlərində də onlayn şəkildə saxlanılır. Bu üsul, ev açarını kiçik hissələrə bölüb maşınla gedərkən pəncərədən çölə atmaqla müqayisə edilə biləcək bir təhlükəsizlik qatını təmin edir. Daim səyahət edən Taihuttu ailəsi, potensial soyğunçular üçün hərəkətli hədəfə çevrilib. Bu qədər ciddi tədbirlərin səbəbi isə aydındır: son illərdə kripto icması silahlı basqınlar, adam oğurluqları və hətta qətllərlə müşayiət olunan təşkilatlanmış cinayətlərin hədəfinə çevrilib.

Hazırda Nyu-Yorkda davam edən və iki həftə ərzində qaçırılıb işgəncəyə məruz qaldığı iddia olunan bir kripto milyonçusunun məhkəməsi vəziyyətin ciddiliyini bir daha ortaya qoyur. Bəzi mütəxəssislərə görə, kripto varlığına sahib olmağın riski, gətirdiyi potensial gəlirlərdən daha yüksək ola bilər. Ailənizi və sərvətinizi cinayətkarlardan qorumaq üçün fasiləsiz səyahət etmək, yəni iz itirmək və gizlənmək zərurəti yaranır. Cüzdan kodlarını isə sizlə əlaqəsi təyin edilə bilməyən, fərqli qitələrdə yerləşən təhlükəsiz evlərdəki seyflərdə saxlamaq vacibdir.

Təbii ki, özünüzə mühafizəçilər tuta və qalaya bənzər təhlükəsizlikli bir evdə yaşaya bilərsiniz. Lakin bir gün həmin mühafizəçilərin belə sizə silah çəkib şifrələrinizi tələb etməyəcəyinə kim zəmanət verə bilər? Sahibi olduğunuz sərvətin sizə aid olduğunu sübut edən heç bir hüquqi sənəd yoxdur - cüzdanın şifrəsi kimdədirsə, kripto vəsait də ona məxsus olur.

Mövcud vəziyyətdə kriptovalyuta dünyası, kiçik alış-verişlər və cüzi qazanc üçün cazibədar görünsə də, bu sahədəki vəsaitləriniz sərvət həddinə çatdıqda, artıq həyatınız belə risk altında ola bilər. Kriptovalyutaların ənənəvi pul və bank sisteminin yerini tutması üçün əvvəlcə təhlükəsizlik sahəsində hələ çox yol qət etməsi lazımdır./Qaynarinfo 

Milli.Az