16 şirkətə 62 milyon dollar yatırıldı

Milli.Az ICTnews-a istinadən bildirir ki, fond daşınan texnologiyalar, yeni qurğular, mobil və simsiz texnologiyalar, mikroprosessor istehsalı, iritutumlu məlumatlar və bulud infrastruktur kimi sahələrlə məşğul olan yeni fəaliyyətə başlamış şirkətləri dəstəkləyib. Həmin şirkətlər arasında, məsələn, 13 yaşlı ABŞ məktəblisi Şubham Banerci tərəfindən təsis edilən Braigo Labs da yer alıb. Şirkətin məhsullarından biri - dəyəri 350 dollar təşkil edən Lego konstruktoru bazasında gözdən əlil insanlar üçün Braigo v1.0 Brayl şriftli printeri qeyd etmək olar. Digər şirkətlərin istehsalı olan oxşar qurğuların hazırda qiyməti iki min dollardır.

Maliyyələşdirmə əsasən ABŞ, İsrail, Çin və Kanada, eləcə də Tayvanda yerləşən şirkətlərə edilib.

Fond ümumi məbləğdən hər şirkətə konkret nə qədər vəsaitin yönəldilməsi barədə məlumat vermir.

Intel Capital ilin sonunadək kapital qoyuluşlarının 355 milyon dollar təşkil edəcəyini gözləyir.

Fond 1991-ci ildən 54 ölkədə 1339 şirkətə 11 milyard dollar investisiya həyata keçirib. Bu müddət ərzində bu şirkətlərin 206-sı birjaya çıxarılıb, 344-ü satılıb və ya birləşmə prosesindən keçib. 2013-cü ilin noyabrına olan vəziyyətə görə, Intel Capitalın investisiya portfeli təxminən 1,6 milyard dollar dəyərində qiymətləndirilib. Fondun məlumatında investisiyaların nəticələri barədə məlumat verilmir.

2013-cü ildə yatırılan sərmayələrin ümumi həcminin yarısından çoxu Şimali Amerika şirkətlərinə yönəldilib. İnvestisiyaların 5 faizi Rusiya texnoloji layihələrinə, eləcə də Yaxın Şərq, Mərkəzi və Şərqi Avropa şirkətlərinə yatırılıb. Ümumilikdə fondun xarici layihələrdə investisiyaları 49 faiz təşkil edib.

Intel Capital ABŞ-ın Intel şirkətinin aparat və proqram təminatlarının işlənməsi, veb-servislər, yarımkeçirici komponentlərinin istehsalı kimi müxtəlif sahələrə vəsaitlər qoyan qlobal investisiya fondudur. Fondun fəaliyyəti təkcə yatırılan vəsaitlərdən gəlirin əldə edilməsinə deyil, həm də Intel şirkətinin ekosisteminin dəstəklənməsinə yönəlib.

Milli.Az