Kiberhücumların miqyası genişlənir

Symantec şirkətinin Symantec's Internet Security Threat Report hesabatına əsasən, son vaxtlar kibercinayətkarların davranışında nəzərəçarpacaq dəyişikliklər baş verib. Belə ki, əvvəllər zəif qüvvə ilə çoxlu kiçik hücumlara cəhd edilirdisə, hazırda cinayətkarlar meqahücumlar üzərində aylarla çalışır və bunun nəticəsində gəlirləri xeyli artır.

Milli.Az ICTnews-a istinadən bildirir ki, şirkət mütəxəssislərinin sözlərinə görə, bir meqahücum kiçik hücumla müqayisədə 50 dəfə daha çox ziyan vurur. Cinayətkarların getdikcə daha çox səbir nümayiş etdirməsi təəccüb doğurur, onlar istədikləri nəticəni əldə etmək üçün gözləməyə və hücuma çoxlu vaxt sərf etməyə hazırdırlar. Bu halda hücumların mürəkkəblik səviyyəsi artır, - Symantec Security Response bölməsinin direktoru Kevin Heyli qeyd edib. Symantecin məlumatına görə, 2013-cü ildə dünyada ən böyük məlumat sızmasının hər səkkizdən biri kibercinayətkarlara on milyonlarla informasiyaya (2012-ci ildə yalnız bir böyük sızma ilə bu hədd keçilib) çıxış əldə etməyə imkan verib.

2013-cü ildə informasiya sızması sayının artımı 62 faiz təşkil edib. Analitiklər qeyd edirlər ki, kiberhücumlar birbaşa zərərlə yanaşı, dolayı yolla da ziyan vururlar. Belə ki, müştərilərin hücumu dəf edə bilməyən və məlumatları oğurlanan şirkətlərə inamı itir.

Ötən il dünya miqyasında məqsədyönlü hücumların (target attacks) sayı 91 faiz artıb. Xatırladaq ki, bu aksiyalar konkret qurban şirkətin seçilməsini və cinayətkarlar tərəfindən şirkətin informasiya təhlükəsizliyi sisteminə uyğun fəaliyyət ssenarilərinin hazırlanmasını nəzərdə tutur. Burada peşəkarlar tərəfindən məxsusi olaraq qurban şirkətlərdə quraşdırılan antivirus və mühafizə vasitələrindən yan keçmək üçün hazırlanan unikal zərərli proqramlardan istifadə olunuğuna görə belə hücumların qarşısını almaq çox çətin olur. Adətən belə hücumlarda insayderlərdən istifadə olunur.

Ərazilərindən internet hücumlarının keçirilməsinin sayına görə birinci yeri ABŞ (20,33 faiz) tutub. Sonrakı yerlərdə Çin (9,39 faiz), Hindistan (5,11 faiz), Niderland (3,52 faiz), Almaniya (3,26 faiz), Rusiya (2,6 faiz) qərarlaşıb. Onluğu Böyük Britaniya, Braziliya, Tayvan və İtaliya tamamlayır.

Milli.Az