Oğurlanan məlumatların sayı açıqlandı

Milli.Az ICTnews-a istinadən bildirir ki, 2013-cü ilin yanvar-iyununda xüsusi xidmət orqanları Microsoft korporasiyasına 15-16 min dəfə, Googlea 9-10 min dəfə, Facebooka 5-6 min dəfə müraciət edib. Ən çox (30 min dəfə) müraciət Yahoo! şirkətinə edilib. Statistikaya yalnız Federal Təhqiqatlar Bürosu (FTB) və Milli Təhlükəsizlik Agentliyinin (MTA) məhkəmə tərəfindən Xarici kəşfiyyat xidmətlərinin fəaliyyətinə nəzarət haqqında (Foreign Intelligence Surveillance Act, FISA) qanuna əsasən təsdiq edilən məxfi sorğuları daxildir.

ABŞ-ın İT şirkətləri xüsusi xidmət orqanlarının sorğuları haqqında informasiyanı Ədliyyə Nazirliyi ilə razılığa gəldikdən sonra açıqlaya biliblər. ABŞ xarici kəşfiyyatına nəzarət üzrə məhkəmə yanvarın sonunda məxfi sorğuların sayı və onların aid olduğu istifadəçi sayı haqqında məlumatların dərc edilməsinə icazə verib. Şirkətlərə bu məlumatları istifadəçilərin və müraciət edən idarələrin adı açıqlanmamaq şərtilə yarım il sonra dərc etməyə icazə verilib.

Şirkətlər qeyd ediblər ki, informasiyanın bu səviyyədə açıqlanması yetərli deyil. Belə ki, Google nümayəndələri bildiriblər ki, internet istifadəçilərini izləməyə imkan verən qanunların necə işləməsini və onların ictimai marağa xidmət etməsini hamının görməsi üçün nəzarət sistemlərinin fəaliyyəti daha şəffaf olmalıdır. Yanvarın ortalarında ABŞ prezidenti Barak Obama da bu sahədə daha çox şəffaflığın olmasını məqsədəuyğun hesab etdiyini bəyan edib.

Microsoft, Google, Yahoo!, Facebook və LinkedIn ABŞ xarici kəşfiyyatına nəzarət üzrə məhkəməyə 2013-cü ilin yayında onların internet istifadəçilərinin izlənməsi üzrə PRISM proqramı çərçivəsində MTA ilə əməkdaşlıq etmələri məlum olduqdan sonra müraciət edərək xüsusi xidmət orqanları tərəfindən istifadəçilər haqqında sorğularla bağlı ətraflı statistikanın dərc edilməsinə icazə verməyi tələb ediblər.

Milli.Az