Yeni Wi-Fi standartı nədir? - ARAŞDIRMA

802.11ac standartı

Milli.Az ICTnews-a istinadən bildirir ki,  802.11ac standartının yaranma tarixini 2011-ci ilin yanvarından götürmək olar. Məhz o zaman Elektrotexnika və Elektronika üzrə Mühəndislər İnstitutu (IEEE) Wi-Fi texnologiyasının yeni standartının ilk qaralama redaksiyasını qəbul edib. Həmin ilin noyabrında isə Quantenna şirkəti router və kommersiya qurğularına  uyğun ilk belə mikrosxem çipseti istehsal edib. Sürətli Wi-Fi texnologiyasının inkişafında digər mühüm mərhələ kimi ötən il keçirilmiş CES sərgisini qeyd etmək olar. Adıçəkilən sərgidə ən böyük mikrosxem istehsalçısı Broadcom yeni kontrollerlər təqdim etmiş, Lenovo, ZTE, Comcast, Huawei və elektronika bazarının  başqa mühüm oyunçuları onları öz məhsullarına tətbiq etməyə razılaşmışdılar.

802.11ac standartı 802.11n-dən nə ilə fərqlənir?

Ən əsası odur ki, yeni Wi-Fi standartı üç dəfə daha böyük sürət təklif edir ki, bu da axın mediası (məsələn, HD video), mobil oyunlar və verilənlərin ötürülməsində öz sözünü deyəcək. Müasir 802.11n standartı bir antenadan 150, ikisindən 300 və üçündən 450 Mbit/s sürət ötürür. 802.11ac standartında bu göstəricilər müvafiq olaraq 450/900/1,3 Qbit/s təşkil edir. 8 antenaya malik 802.11ac standartına uyğun aparatlarda isə sürət 7 Qbit/s çata biləcək.

Yeni versiyanın digər faydalı cəhəti daha geniş əhatə dairəsi və sabit siqnal diapazonuna malik olmasıdır. Buna görə də bir marşrutlayıcının köməkliyi ilə bütün mənzili əhatə etmək mümkün olacaq.

Köhnə Wi-Fi ilə təchiz edilmiş elektronika qurğuları doymuş 2,4 QHs tezliyində işləyir. Buna görə də 802.11ac standartının daha bir üstünlüyü verilənlərin ötürülməsi üçün daha səmərəli 5 QHs diapazonuna keçid hesabına maneələrin aradan qaldırılmasıdır.

802.11ac standartına keçid prosesi bir neçə il çəkəcək, buna görə də yeni Wi-Fi ilə təchiz edilmiş qurğularda köhnə  standartlarla uyğunluq nəzərə aınacaq. Yeni kompüteri satın aldıqdan sonra routeri tullamaq lazım gəlməyəcək: lazım gəldikdə onlar tezliklərini 5 QHs-dən 2.4 QHs-ə avtomatik dəyişə biləcəklər.

IEEE və Wi-Fi Alliance-ın yeni spesifikasiyanı 2014-cü ilin əvvəlinədək təsdiqləyəcəyi gözlənilir. Ekspertlərin qiymətləndirməsinə əsasən, 2015-ci ildə yeni spesifikasiya ən azı 1 milyard qurğuda tətbiq ediləcək. Artıq qiqabitlik Wi-Fi-ı dəstəkləyən kommersiya həlləri bazarda mövcuddur. 2013-cü ildə istehsal edilmiş MacBook Air noutbuku, HTC One smartfonu, ASUS G75VW noutbuku, Toshiba EXCITE (AT10LE - A-107) planşeti, həmçinin Belkin və D-Link şirkətlərinin istehsalı olan routerləri nümunə göstərmək olar.

802.11ac standartının rəsmi təsdiqlənməsinə uzun müddət qalsa da, internet-provayderlər hələ lazımi sürəti təmin etməyə hazır deyillər, artıq yeni Wi-Fi texniki cəhətdən əlçatandır.

WiGig texnologiyası

802.11ac standartı ilə yanaşı, daha bir perspektiv standart - 802.11ad (qeyri-rəsmi şəkildə WiGig adlanır) inkişaf edir. 802.11ac-dan fərqli olaraq sözügedən texnologiya çox yüksək mərkəzi tezlikdə (60 QHs) işləyir ki, bu da ona divarlar arasından siqnal keçirtməyə imkan vermir. WiGig texnologiyasının köməkliyi ilə bir-birinə kifayət qədər  yaxın məsafədə yerləşən qurğuları qoşmaq mümkün olacaq.
Qeyd edək ki, WiGig texnologiyası saniyədə 7 qiqabitə qədər sürət təmin edir. Bu, 802.11n standartının xüsusiyyətindən 50 dəfə çoxdur. Standartın tətbiqi sahəsi monitor, xarici sərt disk və başqa periferiyanın qoşulması, həmçinin böyük həcmli verilənlərin simsiz şəbəkə ilə ötürülməsidir.

5G və LTE-A texnologiyaları

Mobil şəbəkələrin inkişafı yerində saymır. Samsung şirkəti bu ilin mayında beşinci nəsil mobil rabitənin(5G) əsasını təşkil edəcək yeni texnologiyanın işlənib hazırlanması haqqında hesabat verib. Şirkətin yaratdığı ötürücü aparat sınaqlar zamanı 2 kilometrədək radiusda 1 Qbit/s-dən yuxarı sürət nümayiş etdirib. Bu, o deməkdir ki, HD təsvir ölçülü film smartfon və ya planşetə bir saniyə ərzində yüklənə bilər. Lakin 5G-şəbəkələrə 2020-ci ildən tez qoşulmaq mümkün olmayacaq.

Milli.Az