Texnologiya

İlon Mask yeni cihaz hazırlayır

5 İyul 2026 17:11

Baxış: 2 800

VTB-də minimal faiz dərəcəsi ilə nağd kredit 9.9%-dən

#MARAQLI #TEXNOLOGİYA

İnvestorlara təqdim olunan yeni süni intellekt cihazı gələcəkdə Apple və Android smartfonlarına ciddi rəqib ola bilər.

Milli.Az lent.az-a istinadən bildirir ki, İlon Mask məhdud sayda investor qarşısında süni intellekt dəstəyi ilə işləyən yeni cihazın prototipini təqdim edib. Təqdimatın SpaceX-in gözlənilən IPO-sundan az əvvəl keçirildiyi bildirilir.

Məlumata görə, cihaz nazik korpusa malik olacaq və xAI texnologiyalarının dərindən inteqrasiya olunduğu xüsusi əməliyyat sistemi ilə işləyəcək. Aparat platforması kimi isə Qualcomm şirkətinin Snapdragon prosessorunun seçildiyi iddia olunur. Hazırlanmanın əsas üstünlüklərindən biri cihazın birbaşa Starlink peyk şəbəkəsinə qoşula bilməsidir. Bu, cihazın ənənəvi mobil rabitə infrastrukturundan asılı olmadan işləməsinə imkan verə bilər.

Mənbələrin sözlərinə görə, layihə Maskın vahid xidmət ekosistemi yaratmaq strategiyasının bir hissəsidir. Gözlənilir ki, istifadəçilər Apple və Google-un tətbiq mağazalarından asılı qalmadan, daxili süni intellekt agentləri vasitəsilə gündəlik tapşırıqların böyük hissəsini yerinə yetirə biləcəklər.

Layihəyə marağı artıran məqamlardan biri də odur ki, İlon Mask daha əvvəl öz smartfonunu hazırlamaq planlarının olmadığını açıqlamışdı. Lakin mənbələrin iddiasına görə, strategiyanın dəyişməsi onun xidmətlərini iri texnologiya şirkətlərinin platformalarından daha az asılı etmək istəyi ilə əlaqədardır.

Bununla yanaşı, SpaceX-in investorlara layihənin hələ inkişafın ilkin mərhələsində olduğunu bildirdiyi qeyd edilir. Buna görə də cihazın son texniki xüsusiyyətləri və dizaynı bazara çıxarılana qədər dəyişə bilər.

Müəllif: Tural Hüseyn (Milli.Az redaktor)