Bunlar dəmir dərmanlarının təsirini azaldır

Dəmir preparatlarını qəhvə, çay, şərab və süd məhsulları ilə qəbul etmək onların mənimsənilmə effektivliyini azaldır.

Milli.Az xəbər verir ki, bu barədə endokrinoloq Yelena Şafranskaya məlumat verib.

Mütəxəssisin sözlərinə görə, qış aylarında insanlarda yuxululuq, halsızlıq və solğunluq xüsusilə kəskin şəkildə müşahidə olunur və bu hallar tez-tez hava şəraitinin dəyişməsi ilə əlaqələndirilir. Halbuki özünü pis hiss etməyin səbəblərindən biri də dəmirdefisitli anemiya ola bilər.

Dəmir çatışmazlığı zamanı eritrositlərdə oksigenin daşınmasını təmin edən hemoglobinin sintezi zəifləyir. Bu isə hipoksiya vəziyyətinə səbəb olur və orqan və toxumaların fəaliyyətini pozur.

Endokrinoloq qeyd edib ki, dəmirdefisitli anemiyanın korreksiyası üçün həkimlər tez-tez xüsusi dərman preparatları təyin edirlər. Lakin müalicə prosesində qida vərdişləri həlledici rol oynayır. Preparatların effektivliyi onların hansı içki ilə qəbul edilməsindən çox asılıdır.

"Qəhvə, çay və qırmızı şərab dəmirin mənimsənilməsini bloklayır. Bu içkilər təbii antioksidantlar olan polifenollarla zəngindir. Bu maddələrin qruplarından biri olan taninlər hər üç içkinin tərkibində mövcuddur. Qırmızı şərabda və tünd çayda onların konsentrasiyası xüsusilə yüksəkdir ki, bu da həmin içkilərə xas büzücü dad verir və mikroelementin əlçatanlığını azaldır",- deyə Şafranskaya xəbərdarlıq edib.

Həkim əlavə olaraq dəmir preparatlarının süd məhsulları ilə birlikdə qəbul edilməsini tövsiyə etməyib. Çünki onların tərkibindəki kalsium dəmiri bağlayaraq onun mənimsənilməsinə mane olur.

"Dəmiri mədə turşuluğunu azaldan dərmanlarla birlikdə qəbul etmək də məsləhət görülmür. Mikroelementin mədə-bağırsaq traktında mənimsənilməsi üçün turş mühit lazımdır, bu cür preparatlar isə həmin mühitin formalaşmasına mane olur",- deyə həkim fikrini yekunlaşdırıb.

Mina Mikayılova
Milli.Az