Sarımsaq əzməsini ziyilin üstünə vurun - Yox edəcək

Həkim uşaqlarda ziyillərdən xilas olmaq üçün hansı xalq üsullarının təhlükəsiz olduğunu açıqlayıb.

Milli.Az xəbər verir ki, uşaqlarda ziyillərin müalicəsində bəzi xalq üsullarından istifadə oluna bilər, lakin bu metodlara yalnız dermatoloqla məsləhətləşdikdən sonra müraciət edilməlidir. Bunu tibb elmləri namizədi, Piroqov Universitetinin Uşaq xəstəlikləri İnstitutunun dosenti Olqa Tarasova deyib.

Onun sözlərinə görə ziyillər daha çox 12-16 yaş arasında müşahidə olunur, lakin məktəbəqədər yaşlı uşaqlarda da kifayət qədər rast gəlinir.

"Demək olar ki, hər ikinci uşaq həyatında heç olmasa bir dəfə bu problemlə üzləşib. Əsas səbəb isə yerli və ya ümumi immunitetin zəifləməsidir. Virus bir çox insanda mövcuddur, lakin o yalnız uyğun şəraitdə özünü göstərir. Dəriyə xırda travmalar, həddindən artıq tərləmə, stress, yorğunluq, vitamin çatışmazlığı, habelə dar geyim və ayaqqabı bu prosesə təkan verir", - deyə Tarasova bildirib.

"Bəzi hallarda ziyillər bir neçə ay ərzində öz-özünə yox ola bilər. Lakin bəzən onlar bir ildən çox müddətdə sağalmaya müqavimət göstərir. Müasir metodlarla ziyili bir-iki prosedurla çıxarmaq mümkündür, amma virusun dəridə tam zəiflədilməsi və təkrarlanmanın qarşısının alınması üçün vaxt və səbr tələb olunur".

Həkim qeyd edib ki, xalq təbabətində çox vaxt çistotel şirəsi və ya əzilmiş sarımsaqdan hazırlanan qarışıqdan istifadə edilir. Lakin bu maddələr yalnız ziyilin özünə tətbiq olunmalıdır ki, sağlam dəriyə yanıq vurmasın. Bundan başqa, ziyilləri sirkə turşusu ilə də yandırmaq olar, amma bu üsul yüksək ehtiyat tələb edir.

"Xüsusilə sirkə turşusundan istifadə çox diqqət tələb edir, çünki kimyəvi yanıq riski böyükdür. Belə üsullara yalnız həkimlə məsləhətləşdikdən sonra başlamaq lazımdır və nəticə də adətən daha gec alınır", - deyə mütəxəssis xəbərdarlıq edib.

Tarasova həmçinin aptek vasitələrinə salisilik turşusu tərkibli plastır və məhlullara, eləcə də krioterapiya üçün xüsusi dəstlərə diqqət yetirməyi tövsiyə edib. Onun sözlərinə görə ziyillərin ən sürətli və effektiv çıxarılması klinika şəraitində yüksək tezlikli radiodalğa aparatı ilə mümkündür.

İsmayıl
Milli.Az