Yaddaşı gücləndirməyin ən asan yolu tapıldı

Cənubi Koreyada aparılan yeni elmi tədqiqat probiotik əlavələrin Alzheimer xəstəliyi ilə bağlı erkən koqnitiv geriləmənin qarşısını almaqda və yaddaşı qorumaqda effektiv ola biləcəyini göstərib.

Milli.Az qafqazinfo-ya istinadən xəbər verir ki, "Journal of Alzheimer's Disease"də dərc olunan tapıntılar bağırsaq mikrobiotası ilə beyin sağlamlığı arasındakı sıx əlaqəni bir daha sübut edib.

Kvanqju Altsheymer Xəstəliyi və Əlaqəli Demensiyalar (GARD) araşdırma mərkəzinin mütəxəssisləri tərəfindən yürüdülən tədqiqata erkən koqnitiv pozğunluğu olan 87 yaşlı yetkin cəlb olunub. İştirakçılar iki qrupa bölünüb: bir qrupa 24 həftə boyunca gündəlik olaraq tərkibində üç faydalı bakteriya növü (Bifidobacterium animalis, Limosilactobacillus fermentum və Levilactobacillus brevis) olan "KL-P301" kodlu probiotik qarışığı, digər qrupa isə təsirsiz maddə (plasebo) verilib.

24 həftənin sonunda probiotik qəbul edən şəxslərin qan plazmasında Alzheimerin əsas indikatoru sayılan pTau181 zülalının səviyyəsində kəskin azalma qeydə alınıb. Qeyd edək ki, pTau181 beyin hüceyrələrinin fəaliyyətini pozan zərərli tau zülalı dolaşıqlarının göstəricisidir və adətən, demensiya simptomları üzə çıxmazdan əvvəl qanda yüksəlir.

Tədqiqat zamanı probiotik qrupundakı iştirakçıların Klinik Demensiya Reytinq Şkalasında və vizual-məkan yaddaşı testlərində də irəliləyişlər müşahidə edilib. Əlavə olaraq, probiotiklərin iltihab yaradan IL-1β sitokin səviyyəsini əhəmiyyətli dərəcədə azaltması onların iltihabəleyhinə təsir göstərdiyini ortaya qoyub.

Alimlərin fikrincə, zəif bağırsaq sağlamlığı qan-beyin baryerini zəiflədərək neyronların zədələnməsinə yol açır. Probiotiklər isə bağırsaq mikroflorasını tənzimləyərək, beyinə gedən mənfi iltihab siqnallarının qarşısını alır. Tədqiqatçılar bu metodun Alzheimerin erkən mərhələlərində qeyri-dərman müalicə üsulu kimi böyük potensiala malik olduğunu, lakin daha geniş insan qrupları ilə əlavə sınaqlara ehtiyac duyulduğunu bildiriblər.

Müəllif: Ülkər Vəliyeva (Milli.Az redaktor)