Bakıda təhsil alan tələbələrin sayı azaldılacaq - Emin Əmrullayev

Bakıdakı universitetlər köçürülməyəcək, lakin paytaxtda təhsil alan tələbələrin sayının mərhələli şəkildə azaldılması nəzərdə tutulur.

Milli.Az xəbər verir ki, bu barədə elm və təhsil naziri Emin Əmrullayev Trend Beynəlxalq İnformasiya Agentliyinə, APA İnformasiya Agentliyinə və "Xəzər TV" televiziya kanalına birgə müsahibəsində bildirib.

Nazirin sözlərinə görə, məqsəd region universitetlərinin inkişaf etdirilməsi və tələbələrin daha çox bölgələrdə təhsil almasına şərait yaratmaqdır. O qeyd edib ki, Mingəçevir, Qarabağ, Naxçıvan və Lənkəran universitetlərində imkanlar genişləndirilir.

Emin Əmrullayev vurğulayıb ki, bəzi ali təhsil müəssisələrində tələbə sayının artması təhsilin keyfiyyətinə mənfi təsir göstərə bilər. Bu səbəbdən Bakıdakı universitetlərdə tələbə kontingentinin azaldılması və keyfiyyətin artırılması istiqamətində işlər aparılır.

Nazir əlavə edib ki, əsas məqsəd ali təhsilin keyfiyyətini yüksəltmək, region universitetlərini gücləndirmək və paytaxtda sıxlığın qarşısını almaqdır.

Müəllif: Nərmin Mahmudova (Milli.Az müxbir)