Mərkəzi Bankın sədri kreditlərlə bağlı qərar imzaladı - Bundan sonra...

Azərbaycan Mərkəzi Bankının (AMB) İdarə Heyəti "Bank olmayan kredit təşkilatlarında kredit risklərinin idarə edilməsi Qaydası"nı təsdiq edib.

Milli.Az xəbər verir ki, bununla bağlı AMB-nin sədri Taleh Kazımov yeni qərar imzalayıb.

Qərara əsasən, BOKT-ların verdiyi gündəlik kredit aşağıdakı tələblərə cavab verməlidir:

- milli valyutada verilir;

- borcalana birdəfəlik verilmiş kreditin maksimum məbləği 500 (beş yüz) manatdır;

- gündəlik faiz dərəcəsi maksimum 0,3%-dir;

- qaytarılma müddəti maksimum 45 gündür;

- gecikdirilmiş ödənişlərlə bağlı tətbiq edildikdə, gecikdirilmə faizləri və ya dəbbə pulu əsas borc qalığı məbləğinə gündəlik tətbiq olunan faiz dərəcəsinin 2 mislindən çox olmamalıdır;

- kredit üzrə edilməli olan bütün ödənişlərin ümumi məbləği əsas borcun 100%-dən çox olmamalıdır;

- gecikdirmə faizləri və ya dəbbə pulu tətbiq edildikdə, əsas borc üzrə faizlər 30 gündən artıq hesablanmamalıdır;

- təminatı qismində daşınmaz və ya daşınar əmlak çıxış etmir;

- restrukturizasiya olunmur;

BOKT-nin Müşahidə Şurası (Himayəçilik Şurası) tərəfindən BOKT-nin risk iştahasına uyğun olaraq kredit risklərinin idarə olunması siyasəti təsdiq edilməlidir.

Kredit risklərinin idarə edilməsi siyasəti azı aşağıdakıları əhatə edir:

- hər bir kredit növü üzrə bir borcalana və birgə borcalanlar qrupuna, habelə BOKT-yə aidiyyəti olan şəxslərə verilən kreditlərin maksimum həcmi, borcalanın ödəmə qabiliyyətinin qiymətləndirilməsi qaydaları;

- təminatın qiymətləndirilməsi qaydaları, o cümlədən, kənar qiymətləndiricinin seçilməsi meyarları;

- kredit inzibatçılığının aparılması qaydaları;

- qeyri-standart kreditlərin idarə edilməsi qaydaları;

- hesabatlıq.

Maliyyə bazarlarının hüquqi təminatı departamentinə tapşırılıb ki, bu qərarın 3 gün müddətində Azərbaycan Respublikasının Hüquqi Aktların Dövlət Reyestrinə daxil edilməsi üçün Azərbaycan Respublikasının Ədliyyə Nazirliyinə təqdim edilməsini təmin etsin.

"Bank olmayan kredit təşkilatlarında kredit risklərinin idarə edilməsi Qaydası"nın təsdiq edilməsi barədə bu linkə keçid edərək ətraflı tanış ola bilərsiniz.

Milli.Az