Beynəlxalq Muğam Mərkəzi ölkəmizi beynəlxalq festivalda təmsil edir - FOTO

Beynəlxalq Muğam Mərkəzinin direktoru, Əməkdar artist, tarzən, Özbəkistanın mədəniyyət elçisi Sahib Paşazadə və BMM-nin solisti, Qarabağ Universitetinin müəllimi, Əməkdar artist, nağara ifaçısı Kamran Kərimov Pakistanın Kəraçi şəhərində ikinci dəfə təşkil edilən Dünya Mədəniyyəti Festivalında Azərbaycanı təmsil edirlər.
"Art Council Pakistan"ın təşkilatçılığı ilə dekabrın 7-dək davam edəcək festivalda dünyanın 140 ölkəsindən 1000-dən artıq sənətçi çıxış edəcək. Festival çərçivəsində musiqi, teatr və rəqs tamaşaları, təsviri incəsənət nümayişləri, sənətin müxtəlif sahələrini əhatə edən panel müzakirələri və seminarlar təşkil olunur.

Tədbirin təşkilat komitəsi və "Art Council Pakistan"ın prezidenti Məhəmməd Əhməd Şah Azərbaycandan gələn qonaq ifaçıları qarşılayaq onlara festivalın xatirə hədiyyələrini təqdim edib. BMM-nin direktoru Sahib Paşazadə qarşılıqlı olaraq Azərbaycan mədəniyyətini təbliğ edən kitab və suvenirləri festival rəhbərliyinə hədiyyə edib. Pakistanda indiyə qədər keçirilən ən möhtəşəm qlobal bədii forumda Azərbaycanlı musiqiçilərin konserti 29 noyabr tarixində gerçəkləşəcək. 

Əməkdar artist, tarzən Sahib Paşazadə Pakistanın məşhur BOL TV NEWS televiziyasının qonağı olub. Ekskluziv müsahibə üçün efirə dəvət olunan tarzən çıxışı zamanı Azərbaycanın tar aləti haqqında geniş informasiya təqdim edib. Həmçinin Azərbaycan və Pakistan musiqisinin, mədəniyyətinin, adət və ənənələrinin oxşar və fərqli cəhətlərindən söz açıb. 

Dünya Mədəniyyəti Festivalında iştirakından məmnunluğunu ifadə edən tarzən festivalın yüksək səviyyədə təşkilinə və dəvətə görə minnətdarlığını bildirərək, eyni zamanda dünyanın bir çox ölkələrində keçirilən mötəbər festivallarda iştirakı ilə bağlı təəssüratlarını da bölüşüb. BMM-nin direktoru, Əməkdar artist, tarzən, Özbəkistanın mədəniyyət elçisi Sahib Paşazadənin çıxışı efirin aparıcıları tərəfindən böyük maraqla qarşılanıb, xoş təəssürat yaradıb. Müsahibəni qeyd olunan linkə daxil olaraq izləyə bilərsiniz.

Qeyd edək ki, Sahib Paşazadə və Kamran Kərimov bu festivalda artıq ikinci dəfədir ki, ölkəmizi təmsil edirlər. Ötən il keçirilən festival zamanı ifaçılar açılış mərasimində zəngin proqramla çıxış edərək Kəraçidə yerləşən İncəsənət Universitetində Azərbaycan alətləri və musiqisi ilə bağlı ustad dərsi keçmişdilər. Yüksək səviyyədə təşkil edilən festivalda Azərbaycan muğamı və musiqi alətlərimiz böyük sevgi və maraqla qarşılanmışdı.

Milli.Az