Azərbaycanlı kişi “odnoklassniki.ru” saytında yazışan arvadının başını kəsdi - ƏLAVƏ OLUNUB

Mingəçevirdə dəhşətli qətl hadisəsi baş verib. Şəhər Prokurorluğundan Milli.Az xəbər portalına verilən məlumata görə, avqustun 1-də saat 18:00 radələrində Mingəçevir sakini 22 yaşlı Yelena Smirnova həyat yoldaşı, Salyan sakini İlkin Alıyev tərəfindən qətlə yetirilib. İ.Alıyev arvadının başını kəsdikdən sonra könüllü olaraq polisə təslim olub.
 
İ.Alıyev cinayəti qısqanclıq zəminində törətdiyini etiraf edib. O, ilkin dindirmə zamanı həyat yoldaşını "odnoklassniki.ru" saytında oğlanlarla tanış olub yazışmasına görə öldürdüyünü etiraf edib.
Mərhumun 2 yaşlı övladı qalıb.


------------------


Baş Prokurorluğun mətbuat xidmətindən Milli.Az xəbər portalına verilən məlumata görə, avqustun 1-də saat 18:30 radələrində Salyan rayon sakini, 25 yaşlı İlkin Alıyev, Mingəçevir şəhərində kirayənişin yaşadığı mənzildə qeyri-rəsmi nigahda olduğu 22 yaşlı Smirnova Yelena Aleksandrovnanı qısqanclıq zəminində bıçaqla 8-10 dəfə qarın, boğaz və bədəninin müxtəlif nahiyələrindən vuraraq qəsdən öldürüb. Hadisədən təxminən yarım saat sonra İ.Alıyev şəhər Polis Şöbəsinə könüllü gedərək törətdiyi cinayət hadisəsi barədə məlumat verməklə təqsirini boynuna alıb.

Şəhər polis şöbəsindən daxil olmuş məlumat əsasında şəhər prokurorluğunun əməkdaşları tərəfindən hadisə yeri və meyitə məhkəmə-tibbi ekspertin iştirakı ilə video və foto çəkilişlər aparılmaqla baxış keçirilib, iş üçün əhəmiyyət kəsb edən maddi sübutlar, o cümlədən cinayətin aləti olan bıçaq götürülüb.

Faktla bağlı Cinayət Məcəlləsinin 120.1-ci (qəsdən adamöldürmə) maddəsi ilə cinayət işi başlanıb, iş üzrə müvafiq ekspertizalar təyin olunub. Hazırda iş üzrə istintaq şəhər prokurorluğunda davam etdirilir.

Anar Məmmədov
Milli.Az