Qonşudan hamilə qalan bacısını bıçaqlayan şəxsə ağır cəza verildi

Goranboy rayonunda 1993-cü il təvəllüdlü Fərman Qarayev qısqanclıq zəminində 1987-ci il təvəllüdlü bacısı Almaz Qarayevanı (ad-soyadlar şərti verilib - red.) öldürməyə cəhd edib.

Milli.Az "Teleqraf"a istinadən xəbər verir ki, o, bacısının yaşadığı kənddə Telmanla münasibətdə olduğunu və hamilə qaldığını öyrənib.

Fərman bu il mayın 31-də gecə saatlarında işlədiyi Ağdam rayonundan Goranboyun kəndinə Almazın yaşadığı evə gəlib, həyətdə ağaclıqda gizlənərək mənzili müşahidə edib. Səhər saatlarında anası İlhamənin və Almazın uşaqlarının evdən çıxdığını görüb, bacısının tək qaldığına əmin olub.

Bunun ardınca Fərman evə daxil olub, dəhlizdəki dolabdan bıçaq götürüb. Sonra bacısının yatdığı otağa girib, hamilə olduğunu bildiyi halda ona bıçaqla bir zərbə endirib.

Ancaq bıçağın daxilə nüfuz etmədiyini görüb, Almazın yalvarışlarına məhəl qoymadan onun saçından tutaraq boğaz nahiyəsinə iki ardıcıl zərbə endirib.

Daha sonra qadının öldüyünü zənn edərək həyətə çıxıb. Amma Almazın evdən çıxaraq qaçdığını görüb. Bacısını həyətdə arxadan tutaraq yerə yıxıb, boynunu sındırmaq məqsədilə əlləri ilə burub.

Almazın xırıltı səsləri çıxardığını gördükdə onun öldüyü qənaətinə gəlib.

Fərman Daxili İşlər Nazirliyinin "102" xidmətinə zəng edib və bacısını öldürdüyünü bildirib.

Hadisə yerinə gəlmiş polis əməkdaşlarının müraciəti əsasında Almaz vaxtında tibb müəssisəsinə çatdırılıb və həyatı xilas edilib.

İstintaq orqanı tərəfindən Fərmanın barəsində Cinayət Məcəlləsinin 29,120.2.4 (xüsusi amansızlıqla və ya ümumi təhlükəli üsulla adam öldürməyə cəhd) və 29,120.2.8-ci (təqsirkar şəxs üçün aşkar surətdə hamilə vəziyyətində olan qadını öldürməyə cəhd) maddələri ilə ittiham elan edilib.

Fərman ona elan olunmuş ittiham üzrə özünü təqsirli bilib. İfadəsində göstərib ki, hadisədən əvvəlki günlərdə işi ilə bağlı Ağdam rayonunda olub: "Həmin vaxt bacımın pis yola düşdüyünü eşitdim. Goranboy rayonuna gəldim və bacımın başını kəsməyə cəhd etdim".

İş üzrə zərərçəkənin (həm də təqsirləndirilənin şəxsin) anası şahid qismində ifadə verib. O bildirib ki, qızı Almaz qonşusu Telmandan gizli hamilə qalıb: "Mən bunu biləndə Almaz 6 aylıq hamilə idi. Ondan soruşdum ki, niyə vaxtında deməmisən? Bəs sən düşünmədin ki, 5 qardaşın var, səni öldürərlər? Hadisə olan gün səhər bazara getdim. Evə qayıdanda baş verənlərdən xəbər tutdum".

Məhkəmə sənədlərindən məlum olub ki, Almaz bu hadisədən sonra bətnində olan uşağını itirib. Vaxtından əvvəl ölü doğulmuş 26 həftəlik kişi cinsli dölün məhkəmə-tibbi müayinəsi keçirilib. Dölün ölümünə səbəb travmadan baş verən bətndaxili asfiksiya olması istisna edilməyib.

Cinayət işinə Gəncə Ağır Cinayətlər Məhkəməsində baxılıb. Fərman cəzasını ciddi rejimli cəzaçəkmə müəssisəsində çəkməklə 11 il 6 ay müddətə azadlıqdan məhrum edilib.

Hökmdən məhkumun müdafiəçisi apellyasiya şikayəti verib. O, Fərmanın əməlinin Cinayət Məcəlləsinin 126.1-ci (qəsdən sağlamlığa ağır zərər vurma) maddəsinə tövsif olunmasını və məhkuma həmin maddə ilə minimum həddə cəza təyin edilməsini xahiş edib.

Şikayət onunla əsaslandırılıb ki, təqsirləndirilən şəxs zərərçəkmişi sadəcə cəzalandırmaq istəyib. Müdafiəçinin bildirdiyinə görə, hazırda bacı-qardaş barışıblar, zərərçəkmiş şəxs şikayətini geri götürüb.

Təqsirləndirilən şəxsin ilk dəfə məhkum olunduğunu vurğulayan vəkil onun İkinci Qarabağ Müharibəsində iştirak etdiyini, anasının bir neçə ağır xəstəlikdən əziyyət çəkdiyini də diqqətə çatdırıb.

Gəncə Apellyasiya Məhkəməsində vəkilin verdiyi şikayət qismən təmin edilib və birinci instansiya məhkəməsinin hökmü dəyişdirilib.

Təqsirləndirilən şəxsin cəzası 11 il 3 aya endirilib.

Milli.Az