"Azad edilmiş ərazilərinin minalardan təmizləməsi üçün 13 il lazımdır" - ANAMA direktoru

Erməni silahlı qüvvələri Azərbaycanın işğal olunmuş ərazilərini tərk edərkən əsas obyektləri - elektrik xətlərini, su ehtiyatlarını, habelə qəbiristanlıqları minalayıblar.

Milli.Az Oxu.az-a istinadən xəbər verir ki, bunu Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) direktoru Qəzənfər Əhmədov KİV-ə müsahibəsində deyib.

Onun sözlərinə görə, bütün bu fəaliyyətlər Azərbaycanın dinc əhalisinə qarşı yönəldilmişdir ki, qanuni torpaqlarına qayıdan və dünyasını dəyişmiş yaxınlarını ziyarət etmək istəyən insanlar partladılsın.

"Biz Cəbrayıl rayonundan, hansı ki, hər şeyi əyani şəkildə gördük, eləcə də Füzuli və Zəngilan rayonlarından bəhs edirik. Bundan sonra Hadrut, Kəlbəcər və Laçın rayonları təhvil veriləcək, ermənilərin tələ qurmağa çox vaxtları var. Əməkdaşlarımız artıq onların bir çox müxtəlif növlərini aşkarlayıblar", - deyə Q.Əhmədov bildirib.

O, düşmənin həm tank əleyhinə, həm də piyada əleyhinə yüz minlərlə mina quraşdırdığını qeyd etdi və iki gün əvvəl birinin ölümü, digərinin yaralanması ilə nəticələnən iki qardaşın minada partlamasını xatırladı. ANAMA direktorunun sözlərinə görə, bu kontaminasiyadan, yəni ərazinin minalarla dolu olmasından xəbər verir.

Minalanmış ərazilər və onların təmizlənməsinin vaxtı barədə danışan Q.Əhmədov hazırda yol xəritəsi hazırlandığını söylədi. O, bildirib ki, təxminən 14 min kvadrat km ərazi təmizlənməlidir. Bunlardan 3000 kvadrat km-i təhlükəli hesab edilmir;  bunlar asfalt yollardır. Təxminən 7 - 8 min kvadrat km-i döyüş sahəsidir və təxminən 4000 kvadrat km-i isə digər ərazilərdir.

ANAMA direktoru döyüş sahələri ərazisinin partlamamış hərbi sursatlardan təmizləmək üçün 5-6 il, minalardan təmizləmək üçün isə 10-13 ilə qədər vaxt lazım olduğunu bildirib.

Milli.Az