Azərbaycanda yoluxma sayının artma ehtimalı böyükdür - Karantin sərtləşdirilə bilər

Azərbaycandan daha erkən yumşalmaya gedən Avropa və dünyanın bir çox ölkələrində epidemioloji vəziyyət getdikcə pisləşir.

Daha erkən yumşalmaya gedən Gürcüstan, İsrail, Avstriya, Çexiya və başqa ölkələrdə yoluxma halı sürətlə artır. Hətta İsrail hökuməti koronavirusun yayılmasının qarşısını almaq məqsədilə sentyabrın 17-dən məktəblərdə dərslərin dayandırılmasına qərarı verib.

Bəs bu gün Azərbaycan yumşalmalara gedən Azərbaycanı da eyni aqibət gözləyə bilərmi? Bu halın ölkəmizdə təkrarlanmaması üçün hansı addımlar zəruridir?

Bununla bağlı Milli.Az-a TƏBİB-in İnfeksion xəstəliklər üzrə işçi qrupunun həkim-infeksionisti Aygül Əliyeva açıqlama verib:

"Dünyada hal-hazırda yeni tip koronavirusa yoluxanların sayı 30 milyonu keçib. Koronavirus səbəbi ilə ölənlərin sayı isə 935 min nəfərdir. Bu rəqəmlər göstərir ki, dünyada hələ də ciddi şəkildə pandemiya davam edir və bir çox ölkələrdə artıq COVİD-19 infeksiyasının ikinci dalğası başlayıb. Avropa və dünyanın bir çox ölkələri vaxtilə daha erkən ciddi karantin qaydalarında yumşalmalara getdi və həmin ölkələrdə yoluxmanın sürətlə artmasının şahidi olduq. Məcbur qalıb həmin ölkələr yenidən sərt karantin rejiminə keçirlər.   

Ölkəmizdə də vaxtında ciddi karantin rejiminin tətbiq olunması sayəsində yoluxma saylarında azalmanı gördük. Bilirik ki, artıq karantin rejimində müəyyən mərhələlər ilə yumşalmalar tətbiq olunur. Bu yumşalmaların olması vətəndaşlarımıza qətiyyən rahatlıq verməməlidir, əksinə daha da məsuliyyətli olmalıyıq. Həm karantin qaydalarında yumşalmaların olması, həm də payız aylarında  respirator infeksiyaların ən çox müşahidə edildiyi dönəm olduğunu nəzərə alsaq, yoluxma saylarının artma ehtimalı böyükdür.

Yaxın gələcəkdə vəziyyətin necə inkişaf edəcəyi böyük ölçüdə vətəndaşların əlindədir. Vətəndaşlar daha məsuliyyətli olub bütün qaydalara ciddi şəkildə əməl etməlidirlər. Yoxsa bir çox ölkələrdə olduğu kimi bizim ölkə də daha ciddi və təhlükəli vəziyyət ilə qarşılaşa bilər".                             

Təhməz Əsədov
Milli.Az