Gənc oğlanı metronun qarşısında niyə öldürdülər? - YENİLƏNİB - TƏFƏRRÜAT - FOTO - VİDEO

18:16

Bakıda "Nizami" metro stansiyası yaxınlığında gənc oğlan bıçaqlanıb.

Milli.Az bildirir ki, yenicag.az-ın hadisə yerində olan əməkdaşının sözlərinə görə, bıçaqlanan şəxs qanaxmadan hadisə yerindəcə keçinib.

Şahidlərin verdiyi məlumata görə, bıçaqlanmaya  metronun içərisində baş verən mübahisə səbəb olub. Belə ki, bir qızın çiynindən düşən şalı yaşlı bir kişi götürdükdə cinayəti törədən şəxs və onun dostu gülməyə başlayıb. Öldürülən şəxs isə onların gülməsinə iradını bildirib və tərəflər arasında mübahisə düşüb.

Metrodan çıxdıqdan sonra tərəflər arasındakı sözlü mübahisə əlbəyaxa davaya çevrilib. Nəticədə ürək nahiyəsindən bir bıçaq zərbəsi alan gənc yerindəcə dünyasını dəyişib.
Əldə etdiyimiz məlumata görə, ölən şəxs Sabirabad rayonundandır və tələbədir. Onun təxminən 22-23 yaşlarında olduğu bildirilir.

----------
17:43

"Bakı Metropoliteni"nin "Nizami" stansiyası yaxınlığında Emin Şəmiyev adlı gəncin bıçaqlanaraq öldürülməsi ilə bağlı Yasamal rayon Prokurorluğu tərəfindən Cinayət Məcəlləsinin 120.1 (Qəsdən adam öldürmə, yəni digər şəxsi qəsdən həyatdan məhrum etmə) maddəsi ilə cinayət işi açılıb.

Milli.Az xəbər verir ki, bu barədə Trend-ə Baş Prokurorluğun mətbuat xidmətinin rəhbəri Eldar Sultanov məlumat verib.

E.Sultanov bildirib ki, hazırda rayon prokurorluq və polis əməkdaşları hadisə yerindədirlər.

İş üzrə polis və prokurorluq əməkdaşlarından ibarət istintaq əməliyyat qrupu yaradılıb. Cinayətkarın müəyyələşdirilərək tutulması üçün zəruri və təxirəsalınmaz istintaq əməliyyat tədbirləri aparılır.

---------
17:38

Milli.Az baku.ws-ə istinadən xəbər verir ki, şahidlər təcili yardıma zəng vurublar, əraziyə həkimlər cəlb olunub. Lakin həkimlər gələnə qədər gənc oğlan dünyasını dəyişib.

Hadisə şahidləri bildirirlər ki, öldürülən gənc yenicə əsgərlikdən gəlibmiş.

-----------
17:12

Bakıda dəhşətli qətl hadisəsi baş verib.

Milli.Az bildirir ki, bu barədə virtualaz.org-a hadisə şahidləri məlumat veriblər. Qətl hadisəsi metronun "Nizami" stansiyası yaxınlığında baş verib.

Naməlum şəxslər gənci bıçaqlayıblar. Gənc aldığı yaralardan hadisə yerində keçinib. Hazırda məsələ ilə bağlı araşdırma gedir.

Bakı Şəhər Prokurorluğundan verilən məlumata əsasən, qətlə yetirilən şəxs 1996-cı il təvəllüdlü Emin Asif oğlu Şəmiyevdir. Məlumata əsasən, qətl hadisəsi Salatın Əskərova 64 ünvanında qeydə alınıb. Hadisə yerinə polis idarəsinin rəisi və prokuror gəlib.

23 yaşlı gənc ürəyindən aldığı bıçaq zərbəsindən dünyasını dəyişib. Faktla bağlı 120.1. maddəsi ilə cinayət işi qaldırılıb.
Hazırda qətli törədən şəxsin saxlanılması üçün əməliyyat-axtarış tədbirləri keçirilir.

Milli.Az