Hər bir azərbaycanlı 15 sentyabrın əhəmiyyətini dərindən bilməlidir

"1918-ci il sentyabrın 15-də və Azərbaycan Korpusu və Nuru Paşanın rəhbərlik etdiyi Qafqaz İslam Ordusu Azərbaycanın tarixi mərkəzi olan Bakı şəhəri erməni daşnak dəstələrindən və bolşeviklərdən azad edildi. Bununla da Azərbaycan bütövləşdi, Azərbaycan Xalq Cümhuriyyəti və dövlətçiliyimiz yeni müstəqillik mərhələsinə qədəm qoydu. Azərbaycanda hər il sentyabrın 15-ni böyük həvəslə gözləyir və onu xüsusi qeyd edirlər. Bu gün hər bir azərbaycanlı 15 sentyabrın əhəmiyyətini dərindən bilməlidir".

Bu barədə Milli.Az-a açıqlamasında Milli Məclisin üzvü, YAP İcra Katibliyinin şöbə müdiri Aydın Mirzəzadə bildirib.

Millət vəkilinin fikrincə, bu gün Bakı artıq güclü bir dövlətin paytaxtına, o cümlədən dünyanın bir sıra vacib məsələlərinin həll olunduğu bir platformaya çevrilib: "Bakısız Azərbaycan yoxdur. Bakını yenidən milli dövlətimizin paytaxtına çevirməklə Azərbaycan xalqı taleyini öz əlinə almış oldu. Həmin dövrdən başlayaraq Bakı dünya siyasətində, baş verən proseslərdə xüsusi yer tutur.

Əlbəttə uzun müddət lazım idi ki, Azərbaycanın taleyini həll edən ulu öndər Heydər Əliyev və prezident İlham Əliyev siyasi səhnəyə gəlsin. Onların məqsədyönlü və düşünlümş siyasətinin və fəaliyyəti nəticəsidir ki, bu gün artıq Bakı deyəndə bütün dünya inkişaf edən, özünün uğurları ilə diqqəti cəlb edən çox güclü bir dövləti təsəvvürünə gətirir".

Qeyd edək ki, bir neçə gündən sonra Azərbaycanda Bakının 1918-cı il sentyabrın 15-də bolşevik-daşnak silahlı birləşmələrinin əlindən azad edilməsinin 100 illiyi təntənəli şəkildə qeyd ediləcək.

Xatırladaq ki, 100 il bundan əvvəl, 1918-ci il sentyabrın 15-də Nuru Paşanın rəhbərlik etdiyi Qafqaz İslam Ordusu və Azərbaycan Korpusu Bakıya daxil olaraq şəhəri erməni-bolşevik işğalından azad edib. Beləliklə, həm Azərbaycanın müstəqilliyi təmin olunub, həm də ermənilərin və bolşeviklərin Bakı və ətraf rayonlardakı ağalığına son qoyulub. Bakının erməni-bolşevik işğalından azad edilməsi XX əsr Azərbaycan tarixinin ən şərəfli səhifələrindən biridir. Bu möhtəşəm və tarixi qələbədən sonra Azərbaycan Xalq Cümhuriyyəti hökumətinin paytaxtı sentyabrın 17-də Gəncə şəhərindən Bakıya köçürülüb. Beləliklə, Azərbaycanda dövlət quruculuğunun əsas mərhələsinə start verilib.

Bu baxımdan 1918-ci il sentyabrın 15-də Bakının azad olunması Azərbaycan-Türkiyə dostluğu və qardaşlığı zəminində müstəsna əhəmiyyət daşıyan böyük hadisə hesab edilir.

İlkin İzzət
Milli.Az