Ölkə

Adı gələndə taksi sürücülərinin sifarişi ləğv etdiyi yol - 3 aydır ki...

2 Sentyabr 2025 09:37

Baxış: 4 589

VTB-də minimal faiz dərəcəsi ilə nağd kredit 9.9%-dən

#CƏMİYYƏT #YOL #TIXAC #NƏQLİYYAT #TAKSİ

Dərslərin başlamasına az qalıb. 15 sentyabr bilik günü kimi qeyd edilsə də, çoxlarının ağlında tıxac günü kimi qalır. Çünki, 15 sentyabrdan etibarən yollar həddən artıq yüklənir. Məktəbə və universitetə gedənlərin təsiri həmin anda özünü yollardakı sıxlıqla göstərir.

Yay olmasına baxmayaraq Bakıda hər gün tıxac olan yollar var. Bunlardan biri də Binəqədi şosesidir. Hansı ki, hər il yayda rahat "nəfəs ala bilən" şosse bu il "dincələ" bilmədi. Buna səbəb artıq 3 aydır ki, davam edən hələ də bilik gününə qədər yekunlaşacaq kimi görünməyən təmir işləridir.

Binəqədi şosesində iyun ayında başlayan kanalizasiya xətti çəkilişləri 3-cü aydır ki davam etsə də, yolun üç zolağını zəbt edən təmir işləri hər gün, günün istənilən saatında bu ərazidə ağır tıxaca səbəb olur. Avtobuslar bu səbəbdən gecikir, taksilər sifariş götürməkdən imtina edir, şəxsi maşınlar isə ya yollardakı çuxurlarda, ya da ki, ağır tıxaclarda sıradan çıxır. Hələ insanların ömründən gedən saatlar və stress məsələnin digər mühüm tərəfidir.

Aydın məsələdir ki, Bakıda avtomobillərin sayı çoxdur. Şəhər çox yüklənib və bu səbəbdən də tıxaclar da qaçılmazdır. Lakin, qısa müddətə görülməsi mümkün olan işlərin yubanması səbəbindən insanların aylarla yolda qalması vəziyyəti çətinləşdirir.

15 sentyabr yaxınlaşdıqca ümid qalır ki, Binəqədi şosesində aparılan işlər sürətlə yekunlaşsın və yollar əvvəlki, nisbətən rahat vəziyyətinə qayıtsın. Çünki həm sürücülər, həm də sərnişinlər üçün yolun açılması gündəlik gediş-gəlişdə böyük yüngüllük yaradacaq.

İslam
Milli.Az