Bu gün Xəqani Bağırovun 80 yaşı tamam olacaqdı - FOTO

Bu gün Azərbaycanın xüsusi xidmət orqanlarının tanınmış nümayəndəsi Xəqani Bağırovun anadan olmasının 80 illiyi qeyd olunur.

Şübhəsiz ki, hər kəsə nəsib olmur ki, bu dünyadan köç etdikdən illər sonra da onun haqqında yalnız müsbət fikirlər söylənsin - həm peşəkarlıq baxımından, həm də insanlıq keyfiyyətləri kontekstində. Məhz belə şəxsiyyətlərdən biri də Xəqani Bağırovdur.

Milli.Az xəbər verir ki, Gəncə şəhərində anadan olmuş Xəqani​ müəllim, Azərbaycan Neft və Kimya İnstitutunun (indiki ADNSU) energetika fakültəsini bitirib. Sonra onun əmək fəaliyyəti Azərbaycan EA-nın Energetika İnstitutu və "Azneftstroyremont" trestində davam edib. 1968-ci ildən etibarən isə Xəqani​  Bağırov xüsusi xidmət orqanlarında çalışmağa başlayıb və əməliyyat fəaliyyətinə Naxçıvan MSSR-də KQB-nin əməliyyat müvəkkili vəzifəsində start verib. Burada qeyd edilməlidir ki, təhlükəsizlik orqanlarına qəbul olunmaqla Xəqani​  müəllim, sözün əsl mənasında, xüsusi xidmət orqanlarının irsi əməkdaşı olub. Belə ki, onun atası Akif Bağırov da həyatını KQB-yə həsr etmişdi.

Xəqani​  müəllim Azərbaycan SSR KQB-də müxtəlif məsul vəzifələrdə çalışmış, o cümlədən birinci şöbədə - o dövrdə bu bölmə kəşfiyyat adlanırdı - fəaliyyət göstərmişdir. Azərbaycanın müstəqillik qazandığı dönəmdə, 1992-ci ildə isə o, Azərbaycan Respublikasının Dövlət Sərhədinin Mühafizəsi Komitəsinin sədr müavini təyin olunub. Bir il sonra isə Xəqani​  Bağırov Əsir və itkin düşmüş şəxslərlə bağlı Dövlət Komissiyasının işçi qrupuna rəhbərlik etmişdir. 1995-ci ildə isə doğma sahəsinə qayıtdı. Artıq o vaxt KQB ləğv olunmuş, onun bazasında Azərbaycan Respublikası Milli Təhlükəsizlik Nazirliyi (MTN) yaradılmışdı. 1996-cı ildən etibarən Xəqani​ müəllim MTN-in Arxiv Şöbəsinin, sonradan isə Arxiv İdarəsinin rəisi olmuş və 2007-ci ilə qədər bu vəzifədə çalışmışdır. Elə həmin il də təhlükəsizlik orqanlarından təqaüdə çıxıb.

Burada qeyd etmək yerinə düşər ki, Xəqani​ Bağırov "Azərbaycan təhlükəsizlik orqanlarının qısa tarixi" adlı dərsliyin həmmüəlliflərindən biri, eyni zamanda jurnalist Rüqiyə Əliyevanın "Azərbaycanlılar Fransada, İtaliyada və Yuqoslaviyada Müqavimət hərəkatında" və "Soyqırımı analardan başlayır" adlı ciddi araşdırmalarına redaktor və məsləhətçi olub.

Bu bioqrafiya olduqca əhəmiyyətlidir. Amma onun arxasında insan taleyi, duyğuları, çətinlikləri, uğurları, iztirabları gizlənir. Əslində, hamı kimi. Amma etiraf edək ki, təhlükəsizlik orqanlarında çalışmaq - bu, xüsusi bir aləmdir. Çünki sən yalnız "açıq" müstəvidə deyil, eyni zamanda gizli, qeyri-leqal sferada da insanlarla daim təmasda olursan. Bu zaman sən təkcə insanların deyil, eyni zamanda məlumatların təhlükəsizliyinə görə də məsuliyyət daşıyırsan. Həmçinin bəzi vacib məlumatları illərlə, bəzən ömrünün sonuna qədər ən yaxın adamlarından belə gizli saxlamaq zərurəti yaranır.

Məhz bu incəliklər xüsusi xidmət əməkdaşlarını digər peşə sahiblərindən fərqləndirir. Bəli, sirr daşıyan çox insan və qurum ola bilər. Amma xüsusi xidmət əməkdaşları tam fərqli bir üslubda yaşayır və fəaliyyət göstərirlər. Bu, tam başadüşüləndir.

Çoxları üçün "xüsusi xidmət" sadəcə casusluq və ya məlumat əldə etməklə bağlıdır. Amma bu orqanların əməkdaşları da ruha və hislərə malik insanlardır. Onların da ailəsi, dostları, musiqi zövqü, bədii ədəbiyyat marağı və məsuliyyətləri olur. Onlar da övlad tərbiyəsi, ailə qayğısı kimi yük daşıyır. Beləliklə, yalnız kəşfiyyat və əks-kəşfiyyat aləmində "yaşamaq" mümkün olmur.

Xəqani​ Bağırovun timsalında isə bu keyfiyyətlər xüsusi bir parlaqlıqla özünü göstərirdi. Sadiq dost, ləyaqətli övlad, həyat yoldaşı, ata və baba. Sözünün ağası olan insan. Gözəl natiq. Zərif yumor sahibi. Amma bəlkə də ən fərqləndirici keyfiyyəti - sarsılmaz nikbinliyi idi. Həmişə sabaha inam bəsləyən ruh sahibi.

Həyatının sonlarında Xəqani​ müəllimin səhhətində problemlər yarandı. Bu barədə danışmaq istəmirik, amma bu hissəni də ötüşmək olmaz. Çünki nə qədər təmkinlə, səbir və qürurla o, bu dönəmi yaşadı. Ətrafındakılara yük olmamaq üçün bütün gücünü səfərbər etdi. Onun nələr çəkdiyini bilməyənlər belə, Xəqani​  müəllimin daxili qəhrəmanlığını tam başa düşmədilər. Çünki o, dəyişmədən eyni qaldı - necə tanınmışdısa, eləcə də yaşadı.

Son cümlələri yazmaq çətin olsa da, bu Xəqani​ müəllimin nikbinliyinə uyğun şəkildə qeyd edilməlidir: O, həyatı boyu ətrafındakıları - övladlarını, nəvələrini, dostlarını - öz nümunəsi ilə tərbiyə etdi. Onlar onu hər gün görürdü. Həyatda olduğu kimi...

Bu gün Xəqani​ Bağırovun 80 yaşı tamam olardı. Lakin onun həyatı elə keçir ki, doğmaları, dostları və həmkarları onu yalnız may ayının müəyyən günündə deyil, il boyunca, illər keçdikcə dəfələrlə xatırlayırlar. Və qəlbimizdə, ruhumuzda - o, yaşayır. Həmişəki kimi müdrik və nikbin...

Milli.Az