Ölkə

Bakı metrosuna daha 2 yeni qatar gətirildi - FOTO

2 Oktyabr 2024 11:05

Baxış: 752

VTB-də minimal faiz dərəcəsi ilə nağd kredit 9.9%-dən

#METRO

"Bakı Metropoliteni" QSC-nin sifariş etdiyi qatarlardan daha 2-si paytaxta çatdırılıb.

Milli.Az xəbər verir ki, bununla da, 2024-cü ildə Bakı metrosuna gətirilmiş yeni qatarların sayı 4-ə çatıb.

Xatırladaq ki, yaxın 3 ildə metroda 65 yeni nəsil vaqonu və yaxud hər biri 5 vaqondan ibarət olan 13 qatar xəttə buraxılacaq. Bu qatarlardan 7-si və yaxud 35 vaqon 2024-cü ildə Bakıya gətirilməlidir.

Yeni qatarlar innovasiyalar baxımından sonuncu - 4-cü nəslə aid texnologiyalar əsasında istehsal olunacaq. Rusiyada layihələndirilərək istehsal olunan vaqonların təchizatı "Bakı Metropoliteni"nin texniki şərtləri əsasında həyata keçirilir. Texniki şərtlərdə qatarların idarəetməsi, texnoloji təchizatı və sərnişin rahatlığını təmin edən sistem və avadanlıqlar quraşdırılır.

Yeni qatarların baş vaqonları 38, orta vaqonları 44 oturacaqlıdır. Bu isə sərnişin tutumunun artmasına şərait yaradır. Ümumilikdə baş vaqonlar 315, orta vaqonlar 329 sərnişin üçün hesablanıb. Vaqonlar arasında birbaşa keçidlər sərnişin salonunun 15 % genişlənməsinə və daha çox sərnişin daşımağa, Bakı metrosu üçün xüsusi əhəmiyyət kəsb edərək sərnişinlərin qatar boyunca hərəkət etməsinə və bərabər paylanmasına şərait yaradır. Salon qapıları əvvəlki nəsil vaqonları ilə müqayisədə daha enlidir. Bu isə metropoliten üçün ən mühüm məsələlərdən biri kimi, sərnişinlərin daha sürətli minib-düşməsini təmin edir.

Vaqonlarda ayaq üstə dayanan, iri yük və uşaq arabaları ilə hərəkət edən sərnişinlər üçün çoxfunksiyalı zonalar, baş vaqonlarda maşinist kabinasının arxasında olmaqla əlil arabaları üçün yerlər mövcuddur. Mobil cihazları enerji ilə yükləmək üçün USB portlar, müasir məlumatlandırma sistemləri də sərnişin məmnunluğuna müsbət təsir edən elementlərdir.

Milli.Az
Xəbərlərimizi WhatsApp kanalımızdan da oxuyun