Ölkə

İstirahət mərkəzlərində kamin təhlükəsi - Bədbəxt hadisələrdən necə sığortalanmalı?

23 Yanvar 2023 15:59
Baxış: 620

Dünən Qusar rayonunun Caqar kəndində "Park Qusar" istirahət mərkəzinin ərazisində kotecdə yanğın baş verməsi nəticəsində bir ailənin 3 üzvü və daha bir nəfər olmaqla 4 nəfər ölüb, 6 nəfər yaralanıb.

İlkin araşdırmalarla yanğının kotecdəki odun sobasının (kamin) nəzarətsiz qalması səbəbindən baş verdiyi ehtimal edilir.

Bəs insanlar necə etsinlər ki, bu təhlükə ilə üz-üzə qalmasınlar.

Məsələ ilə bağlı Trend-ə açıqlama verən təhlükəsizlik məsələləri üzrə ekspert Elmar Nurəliyev bildirib ki, bütün növ istirahət, əyləncə mərkəzlərində təhlükəsizlik qaydaları kompleks şəkildə görülməlidir.

"Yanğın təhlükəsizliyinə də mütləq riayət edilməlidir. Və yanğın təhlükəsizliyinə nəzarət edən şəxs təyin olunmalıdır. Bu şəxs mütləq peşə təlimi keçmiş şəxs olmalıdır. İstirahət məkanının yanğından təhlükəsizlik planı hazırlanır və dövlətin aidiyyəti qurumu ilə razılaşdırıldıqdan sonra təsdiq olunur. İstirahət mərkəzlərində yerləşən koteclərdə yanğın təhlükəsizliyi norma və standartlara uyğun layihələndirilməlidir."

Ekspert bildirib ki, əsasən taxta koteclər meşəlik ərazilərdə yerləşir.

"Həmin ərazilərdə yerləşən koteclərin üzlüyü mütləq yanmayan materialla üzlənməli və ətrafında tez alışan materiallar, mayelər, avadanlıqlar olmalı deyil. Daha sonra isə kotecin içində soba və kamin varsa, onların yerləşdiyi yer təxminən 2 kvadratmetr sahədə yanmayan döşəmədən olmalı, divarı, tavanı yanmayan üzlüklə üzlənməlidir. Sobaların və kaminlərin istismarı mütləq qaydada təlimata uyğun formada həyata keçirilməlidir. Belə ki, soba və kaminlərin yerləşdiyi otaqlar tərk edilərsə belə mütləq nəzarətdə saxlanılmalı və yanan od söndürülməlidir."

E.Nurəliyev həmçinin bildirib ki, bəzən olur ki, otaq isti qalsın deyə soba və kamin söndürülmür.

"Bu da sonda bədbəxt hadisələrin baş verməsi ilə nəticələnir. İstirahət mərkəzlərində təhlükəsizliyə cavabdeh şəxs gələn qonaqları mütləq şəkildə təhlükəsizlik qaydaları ilə tanış etməlidir ki, belə hadisələr baş verməsin", - deyə ekspert qeyd edib.

Milli.Az

İllik 12,99%-dən 40 000 manatadək zaminsiz komissiyasız kredit
Azernews Newspaper

XƏBƏR LENTİ

Copyright © 2023 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics