Bir çox sürücünün bilmədiyi həmin "E" hərfinin mənası və işləmə prinsipi

Avtomobil texnologiyalarının keçmişinə nəzər saldıqda, xüsusilə köhnə model mexaniki sürət qutularında (mexanika) rast gəlinən bəzi hərflər sürücülər üçün sirr olaraq qalırdı.

Milli.Az xəbər verir ki, mexaniki vites qolunda yer alan "E" hərfi ingilis dilindəki "Economy" (İqtisadiyyat/Qənaət) sözünün baş hərfidir. Bu ötürmə növü avtomobilin yanacaq sərfiyyatını minimuma endirmək üçün xüsusi olaraq hazırlanmış bir rejimdir.

Əsasən 5-ci ötürmə (skorus) məntiqi ilə işləyən bu sistem, uzun yollarda mühərrikin dövrlər sayını (oborot) aşağı tutmağa xidmət edir.

Aşağı dövr, yüksək sürət: "E" rejimi mühərriki məcbur etmədən, onun ən səmərəli dövrlərdə işləməsini təmin edir.

Bu rejimdə avtomobil sürətli sürətlənmə (akselerasiya) təmin etmir, əvəzində sabit sürətlə hərəkət edərkən yanacağa maksimum qənaət edir.

Bəzi köhnə modellərdə 4-cü ötürmədən sonra gələn bu pillə "5" əvəzinə "E" ilə işarələnirdi. Bunun səbəbi həmin pillənin ötürmə nisbətinin (gear ratio) çox aşağı olmasıdır. Yəni bu ötürmə avtomobili sürətləndirmək üçün deyil, artıq yığılmış sürəti ən az yanacaqla qorumaq üçün nəzərdə tutulmuşdu.

Mütəxəssislər bildirirlər ki, bu rejim yalnız yanacaq pullarına qənaət etmir:

Mühərrikin ömrünü uzadır: Aşağı dövrlərdə işləyən mühərrik daha az qızır və hissələr daha gec aşınır.

Mühərrikin səsi minimuma endiyi üçün kabin daxilində daha rahat və səssiz mühit yaranır.

Texnologiya inkişaf etdikcə mexaniki və avtomat qutularda fərqli işarələr də yaranıb:

S (Sport): Performans və yüksək dövr rejimini aktivləşdirir.

G (Gelände/Terrain): Bəzi alman avtomobillərində çətin ərazi şəraiti üçün aşağı sürətli, lakin yüksək güclü ötürməni ifadə edir.

B (Brake): Xüsusilə hibrid və elektrikli avtomobillərdə mühərriklə tormozlama rejimini göstərir.

Lalə Qüdrətova
Milli.Az