İstilər gəlir, sürücülər bu maşınları "əldən çıxarırlar" - Ucuzlaşacaq

Yay fəsli yaxınlaşdıqca avtomobil bazarında qiymət dəyişiklikləri müşahidə olunur. Bəzi modellər bahalaşır, digərləri isə ucuzlaşır. Bu dəyişikliklərin əsas səbəbi mövsümi tələbat və avtomobillərin spesifik xüsusiyyətləridir. Xüsusilə, LADA Niva və Chevrolet Cruze kimi modellər yayda daha az tələb gördüyü üçün onların qiymətlərində eniş gözlənilir.

LADA Niva əsasən çətin yolları olan bölgələrdə yaşayan insanların və off-road həvəskarlarının üstünlük verdiyi bir avtomobildir. Onun tam ötürücülü (4x4) sistemi, yüksək yol tutumu və sadə texniki quruluşu qış aylarında böyük üstünlük sayılır. Lakin yayda havanın isti olması və kondisioner sisteminin zəifliyi bu avtomobili sürücülər üçün narahat edir. Bundan əlavə, şəhər içində çox yanacaq sərf etməsi yay aylarında onu əlverişsiz seçimə çevirir. İnsanlar yayda daha komfortlu və az yanacaq işlədən avtomobillərə üstünlük verdikləri üçün Niva-nın alıcıları azalır və qiymətində eniş baş verir.

Chevrolet Cruze isə mühərrikinin soyutma sistemi ilə bağlı problemlərə görə yayda daha az arzuolunan avtomobil sayılır. Cruze modellərində mühərrikin tez-tez qızması və radiator sisteminin zəifliyi sürücülər üçün narahatlıq yaradır. Şəhər hərəkətində və tıxaclarda mühərrikin həddindən artıq qızması riskli olduğuna görə sürücülər daha etibarlı avtomobillərə üstünlük verirlər. Yay aylarında uzun məsafəli səyahətlər artdığı üçün Cruze etibarsız hesab olunur və alıcılar ondan çəkinir. Bu da onun qiymətinin aşağı düşməsinə səbəb olur.

Off-road avtomobilləri əsasən çətin keçilən yollar üçün nəzərdə tutulub və qış aylarında bu modellərə tələbat yüksək olur. Lakin yayda hava şəraitinin yaxşılaşması ilə insanlar daha ekonomik və komfortlu avtomobillərə yönəlirlər. Off-road modelləri adətən çox yanacaq sərf etdiyi və iri ölçülü olduğu üçün yay aylarında əlavə xərc və çətinlik yaradır. Sürücülər daha yüngül və qənaətcil avtomobilləri üstün tuturlar. Bundan əlavə, yay aylarında idman avtomobillərinə və kabrioletlərə maraq artır.

Yayda bəzi avtomobillərin qiymətinin artması da gözləniləndir. Yanacağa qənaət edən hibrid və benzinli sedanlar, səyahət üçün ideal olan rahat SUV-lər, eyni zamanda sport və açıq damlı avtomobillər yay mövsümündə bahalaşır.

İslam
Milli.Az