Dünya

Çində ənənəvi Duanu bayramı qeyd olunur

14 İyun 2021 21:59
Baxış: 327

Çin xalqı qədim bayramlarından biri olan Duanu festivalını qeyd edir.

Milli.Az AZƏRTAC-a istinadən bildirir ki, bayramla əlaqədar ölkənin müxtəlif yerlərində şənliklər, mərasimlər, yarışlar təşkil olunur.

Şərq xalqlarının ay təqvimi ilə hər il 5-ci ayın 5-ci günü keçirilən bu bayram eramızdan əvvəl IV-III əsrlərdə yaşamış vətənpərvər şair Çu Yuanın şərəfinə meydana gəlib. Rəvayətə görə, şair "Döyüşən hökmdarlıqlar" dövründə Çu hökmdarlığında yaşayıb. O, Çu hökmdarlığını məhv olmaqdan qurtarmaq gücündə olmayıb və 5-ci ayın 5-ci günü (Çu hökmdarlığının Çinq hökmdarlığı tərəfindən zəbt edilməsindən sonra) özünü Miluo çayına ataraq intihar edib. Əfsanəyə görə, şairin ölümündən sonra insanlar qayıqlara oturub çayda onun cəsədini xeyli axtarıblar. Hətta balıqların onun cəsədini yeyəcəyindən ehtiyat edərək suya xeyli miqdarda düyü atıblar ki, balıqlar düyünü yeyib, şairin cəsədinə toxunmasınlar.

Həmin hadisədən sonra hər il beşinci ayın 5-ci günü böyük şairin xatirəsinə çaylarda ənənəvi olaraq əjdaha formasında qayıqlarda yarışlar keçirilir. Eyni zamanda, çaya Çu Yuan üçün bişmiş düyü ilə doldurulmuş bambuk buğumları atırlar. Bu bayramda "Cunqci" - yarpağa bükülmüş düyü yemək adəti də var.

Çin Xalq Respublikası hökuməti 2005-ci ildən bu bayramın dövlət səviyyəsində qeyd olunması barədə qərar qəbul edib.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.