ABŞ çalxalanır: Trampa qarşı etirazlar artır - YENİLƏNİB - VİDEO - FOTO

12:29

ABŞ-ın Nyu-York şəhərində ölkənin yeni seçilmiş prezidenti Donald Tramp əleyhinə keçirilən etiraz aksiyası zamanı polis 30 nəfəri saxlayıb.

Bu barədə Trend RİA Novosti agentliyinə istinadən məlumat verir.

D.Trampa qarşı etiraz edən minlərlə sakin şəhər küçələrinə çıxaraq Trump Tower göydələninə qarşı yürüş keçirməyə cəhd göstərib.

Etiraz aksiyaları Çikaqo, Filadelfiya və Bostonda da keçirilib.

Xatırladaq ki, D.Tramp noyabrın 8-də ABŞ-da keçirilən prezident seçkilərində qalib gəlib. Yeni seçilmiş prezident yanvarın 20-də inauqurasiyadan sonra vəzifəsinin icrasına başlayacaq. Demokratların namizədi Hillari Klinton isə seçicilərin yetərincə səsini toplaya bilməyərək öz məğlubiyyətini etiraf edib.

----------

10:50

ABŞ-da keçirilmiş prezident seçkilərində Donald Trampın qələbəsinə etiraz edənlərin aksiyaları səngimək bilmir.

Milli.Az ABC-yə istinadən bildirir ki, Vaşinqtonda 500 nəfər Ağ Ev və Kapitoli arasındakı "Trump International" otelinin qarısına yığışıblar.

Onlar "Tramp mənim prezidentim deyil!", "Trampsız, Ku-Kluks-Klansız və faşistlərsiz ABŞ!" qışqırırlar.

Nyu-Yorkda 5 minə yaxın amerikalı "Trump Tower" qarşısında etiraz aksiyası keçiriblər.

Boston, Sietl, Çikaqo, Fladelfiya, Portlend, Oreqon, Ostin şəhərlərində Trampın əleyhdərları ilə tərəfdarları arasında toqquşmalar olub.

D.Trampın prezident seçilməsinə etiraz edənlər bu gün Los-Anceles, San-Fransisko və Oklenddə etiraz yürüşləri ilə mitinqlər keçirəcəklər.

Müxtəlif şəhərlərdə D.Trampın müqəvvaları yandırılıb.

Aksiya iştirakçıları bildiriblər ki, gələn ilin yanvarın 20-də, Donald Trampın prezident postunda inauqurasiya mərasimində kütləvi aksiyalar, iğtişaşlar təşkil edəcəklər.

Sietldə aksiya zamanı atışma olub, 4 nəfər yaralanıb.

Kaliforniya və Oreqon şəhərlərində isə küçələrə çıxan Tramp əleyhdarları dükanların vitrinlərini sındırıblar, zibil qablarını yandırıblar. Aksiyalara hətta məktəblilər də qoşulub.

Milli.Az