Türkiyədə nurçuların telekanalının lisenziyası ləğv edildi, holdinqdə axtarış başlandı - YENİLƏNİB

11:17

Türkiyənin Ali Radioteleviziya Şurası (Radyo Televizyon Üst Kurulu, RTÜK) ölkənin populyar telekanallarından olan Kanaltürk-ə çox ağır cəza verib.
 

Milli.Az AHT-yə istinadən bildirir ki, RTÜK-ün qərarına görə, Kanaltürkün Türkiyə ərazisində yayım hüququ ləğv olunur. Bu qərardan sonra telekanal yalnız lokal, bölgə yayımını reallaşdıra biləcək.
 

"Koza İpek Grubu" şirkətinin 2008-ci ildə satın aldığı telekanal RTÜK-dən ümummilli yayım hüququnu tələb etmiş, istəyinə çatmayandja məhkəməyə müraciət etmişdi. 2010-cu ildə məhkəmə qərarı ilə Kanaltürk-ün iddiası qanuni sayılmış və telekanala ümummilli yayım hüququ verilmişdi.
 

Kanaltürk-ün nurçuluğun lideri Fətulla Gülənə yaxın olduğu iddia edilir.

----------
10:46

İstanbulun Vergi Müfəttişliyi Gülən hərəkatı ilə əlaqəli olan "Kaynak Holding" şirkətində araşdırma aparır. Trend-in məlumatına görə, bu barədə cümə axşamı "Sabah" qəzeti xəbər yayıb.

NT mağazalar şəbəkəsini özündə birləşdirən "Kaynak Holding" Fətullah Gülən [hazırda ABŞ-da yaşayan tanınmış din xadimi] hərəkatı ilə sıx əlaqələri olan şirkətlərdən biridir.
Bununla yanaşı, polis şirkətin binasında axtarış aparır.

Bir müddət əvvəl R.T.Ərdoğan F.Gülənə bağlı hərəkatın fəaliyyətini tənqid edib və bu hərəkatı paralel struktur adlandırıb.

Onun sözlərinə görə, paralel struktur ölkədə bütün siyasi qüvvələri, o cümlədən müxalifəti şantaj edir.

Baş nazir qeyd edib ki, bu hərəkatın məqsədi bütün strukturlara və dövlət qurumlarına soxulmaqdır: "Paralel struktur ölkədə məkrli niyyətinə çatmaq üçün hər şeyi edir. Bu strukturun ölkənin hüquq-mühafizə orqanlarında əlaqələri var".

Türkiyədə nurçulara məxsus olan "Kanaltürk" telekanalının ölkə miqyaslı yayım lisenziyası Radio Televiziya Üst Kurulu (RTÜK) tərəfindən ləğv edilib.

APA-nın Türkiyə mediasına istinadən verdiyi məlumata görə, RTÜK öz qərarını bu barədə məhkəmə qərarının olması ilə əsaslandırıb. Qərara əsasən, "Kanaltürk" ölkə miqyasında deyil, yalnız regional yayımla məşğul ola bilər. RTÜK-ün Cümhuriyyət Xalq Partiyası və Milliyyətçi Hərəkat Partiyası tərəfindən seçilmiş üzvləri qərarın əleyhinə səs veriblər.

Fətullah Gülən tərəfdarlarına məxsus "Kaynak Holding"in mərkəzi ofisində isə MASAK (Maliyyə Suçlarını Araşdırma Kurulu) əməkdaşları və İstanbul polisi tərəfindən axtarış başlanıb. Çirkli pulların yuyulması və vergi gizlətmək ittihamı ilə aparılan istintaq çərçivəsində holdinqin maliyyə-mühasibat sənədləri və kompüterləri müsadirə edilib. Qeyd edək ki, holdinqin tərkibində 16 müxtəlif sektorda fəaliyyət göstərən 23 şirkət var. Bu şirkətlərdə 7 minə yaxın insan çalışır.  

Milli.Az