“Qiyamətin xəbərçisi” 1000 metr dərinlikdən sahilə çıxdı - FOTO

ABŞ-nin Kaliforniya ştatında sahilə vuran sirli balıq onu görənləri həm təəccübləndirib, həm də narahat edib.

Milli.Az xəbər verir ki, qara rəngi, yanmış taxta təsiri yaradan bədəni, iti dişləri və başından sallanan, parlayan tilovu xatırladan çıxıntısı ilə diqqət çəkən bu canlı, təxminən 1000 metr dərinlikdə yaşadığı bilinən "Pacific Footballfish" olub.

Okeanın qaranlıq dərinliklərindən gələn bu qeyri-adi balıq bəzi insanlar tərəfindən "qiyamət xəbərçisi" kimi də qiymətləndirilib.

"Smithsonian Institution"da çalışan dəniz bioloqu Janet Watkins bildirib ki, bu qədər dərinlikdə yaşayan növlərin səthə çıxması mühüm göstərici ola bilər. Onun sözlərinə görə, bu canlılar okean ekosistemində bizə mühüm siqnallar verən göstəricilərdir. Onların gözlənilmədən görünmələri suyun temperaturu, axınlar və ya qida zəncirində baş verən görünməz dəyişikliklərə işarə edə bilər.

Dərin dəniz balıqlarının sahildə görünməsi, səthdə baş verən iqlim və ya insan fəaliyyəti ilə bağlı dəyişikliklərin dəniz həyatına birbaşa təsir etdiyini göstərən güclü sübut sayılır.

Hadisə yerinə gələn ekspertlər əvvəlcə balığı xilas etməyə ümid etsələr də, vəziyyətin digər tərəfi daha çətindir. Dəniz ekoloqu Sarah Lowe bildirib ki, dərin dəniz balıqları səthə çıxdıqda böyük təzyiq fərqi səbəbindən toxumalarında ciddi zədələnmə yaranır.

Onun sözlərinə görə, təzyiq və temperatur fərqi onun daxili orqanlarına ciddi zərər vurur. Səthə çıxan bu cür canlılar adətən artıq ağır zədələnmiş olurlar.

Pacific Footballfish balığının ən diqqət çəkən xüsusiyyətlərindən biri başından çıxan və qaranlıq suda işıq saçan "illicium" adlı orqandır. Bu quruluş ovları cəlb etmək üçün istifadə olunur və iti dişlərlə dolu ağızla birlikdə ölümcül tələ yaradır. Mütəxəssislərin fikrincə, sahilə vuran bu nadir nümunə elmi araşdırmalar üçün unikal fürsət yaradır.

Dünyada zaman-zaman nəhəng kalmarlar, köpəkbalıqları və ya digər dərin dəniz canlıları sahilə çıxır. Lakin Pacific Footballfish balığının dayaz sulara qədər gəlməsi okeanın düşündüyümüzdən daha mürəkkəb və həssas ekosistemə malik olduğunu bir daha göstərir. Bildirilir ki, bu cür hadisələrin artması dənizlərin dəyişən tarazlığı ilə bağlı yeni suallar yaradır.

Mina Mikayılova
Milli.Az