Jurnalist diri-diri yandırıldı: Qəzzadakı görüntülər dünyanı dəhşətə gətirdi

İsrailin Qəzzada bir xəstəxana kompleksinə həyata keçirdiyi hava hücumu nəticəsində diri-diri yandırılan jurnalist Helmi əl-Fakavi həyatını itirib. Hadisə yerindən yayılan görüntülər izləyənləri dəhşətə gətirib. Fələstinli rəsmilər hücumun medianı susdurmağa yönəlmiş qəsdən hazırlanmış bir plan olduğunu bildirirlər.

Bazar ertəsi günü Qəzzanın cənubundakı Xan Yunus şəhərində yerləşən media çadırını hədəf alan hava hücumu zamanı jurnalist Helmi əl-Fakavi diri-diri yanaraq vəfat edib.

Yerli jurnalistlər birliyi və tibbi heyət, hücum nəticəsində 9 jurnalistin yaralandığını, bəzilərinin vəziyyətinin ağır olduğunu açıqlayıb.

Media çadırının Nasser Xəstəxanasının həyətində yerləşdiyi qeyd olunub. Sosial mediada paylaşılan və Reuters tərəfindən təsdiqlənmiş görüntülərdə ətrafdakıların yanğına müdaxilə etməyə çalışdığı, Helmi əl-Fakavinin isə şok vəziyyətində stulda oturduğu və bədəninin yarısının alov içində olduğu görünür.

İsrail tərəfi açıqlama verməyib

İsrail hakimiyyəti hadisə ilə bağlı heç bir sualı cavablandırmayıb. Sağlamlıq rəsmiləri hava hücumu nəticəsində ikinci bir fələstinlinin də həyatını itirdiyini bildirib.

Tabutun üzərində mavi "press" jileti

El-Fakavinin dəfn mərasimində onun həmkarları və yaxınları iştirak edib. Tabutu mavi rəngli "PRESS" (media) jileti ilə örtülərək aparılıb.

Dəfn mərasimində danışan jurnalist Əbd Şaat deyib:

"Mesajımızı çatdırmağa və həqiqəti bütün dünyaya bildirməyə davam edəcəyik. Bu, bizim insani vəzifəmizdir."

Fələstin rəsmilərinə görə, 2023-cü ilin oktyabr ayından bu yana Qəzzədə öldürülən jurnalistlərin sayı 210-u keçib. Fələstin Xarici İşlər Nazirliyi, əl-Fakavinin ölümünü "məhkəməsiz edam" kimi qiymətləndirib.

Açıqlamada bu hücumların jurnalistləri qorxutmağa və xəbərlərin qarşısını almağa yönəldiyi vurğulanıb.

Yerli səhiyyə mənbələrinin məlumatına görə, bazar ertəsi günü Qəzzə zolağı boyunca həyata keçirilən İsrail hücumlarında ən azı 20 nəfər həyatını itirib. Hücumların eyni anda bir neçə nöqtəyə yönəldiyi bildirilib.

Lalə Qüdrətova
Milli.Az