Cənubi Koreya polisi prezidentin həbsini öz üzərinə götürməkdən imtina edib - YENİLƏNİB

​10:58

Koreya Respublikasının Korrupsiyaya qarşı İstintaq İdarəsi (CIO) prezident Yun Sok Yolun həbs orderinin icrasını polisə həvalə etməyə cəhd etdikdən sonra polis təkbaşına bu məsuliyyəti öz üzərinə götürməkdən faktiki olaraq imtina edib.

Milli.Az TASS-a istinadən xəbər verir ki, bu barədə "Yonhap" agentliyi məlumat yayıb.

"Hüquqi yoxlamadan sonra biz həbs orderinin tətbiqi ilə bağlı Korrupsiyaya qarşı İstintaq İdarəsindən daxil olan bildirişin hüquqi cəhətdən mübahisəli məzmuna malik olması qənaətinə gəldik. İdarə ilə həbs orderinin tətbiqi barədə məsləhətləşmələri davam etdirməyi qərara aldıq", - polis xüsusi istintaq qrupu rəhbərinin müavini bildirib.

Agentliyin məlumatına görə, polis faktiki olaraq orderin icrasından imtina etmək niyyətini nümayiş etdirib. CIO yanvarın 5-dən 6-na keçən gecə Koreya Respublikasının prezidenti Yun Sok Yolun qiyam işi üzrə həbs orderinin icrasını polisə həvalə etməyi qərara alıb. Orderin müddəti yanvarın 6-da başa çatır. İdarə onun müddətinin uzadılması üçün məhkəməyə müraciət etmək niyyətindədir.

***
08:02

"TASS" agentliyinin məlumatına görə, "Korrupsiya İstintaq İdarəsi bu gecə şübhəli Yoon haqqında həbs orderinin icrasını Milli İstintaq İdarəsinə həvalə edib", - CIO bildirib.

2024-cü il dekabrın 31-də Cənubi Koreya məhkəməsi prezident üçün həbs orderi çıxarıb. Bu orderin müddəti 2025-ci il yanvarın 6-da bitir. Daha əvvəl güman edilirdi ki, CIO yeni order üçün müraciət edə və ya mövcud orderin müddətini uzatmağa cəhd edə bilər.

Milli İstintaq İdarəsi Koreya Milli Polis Agentliyinin tərkib hissəsidir. Yanvarın 3-də birləşdirilmiş istintaq qrupunun nümayəndələri prezidentin mühafizə xidməti ilə 5,5 saat davam edən qarşıdurmadan sonra prezident iqamətgahının ərazisini tərk ediblər.

Onu da qeyd edək ki, Korrupsiyaya Qarşı Mübarizə üzrə İstintaq İdarəsi Koreya Respublikasının Milli Polis Agentliyinin bir hissəsidir.

Lalə Qüdrətova
Milli.Az