PUL
"KXDR ölkənin suverenliyinə qəsd ediləcəyi təqdirdə düşmənlərinə qarşı nüvə silahından tərəddüdsüz istifadə edəcək".
Milli.Az oxu.az-a istinadən xəbər verir ki, bu barədə Şimali Koreya lideri Kim Çen In bəyan edib.
Bu xəbərdarlıq Cənubi Koreya Prezidenti Yun Sok Yolun Pxenyana qarşı hədələrinə cavab olaraq səslənib.
Kim Çen In cənubi koreyalı həmkarını KXDR-in nüvə silahından istifadə cəhdlərinə qətiyyətli və dağıdıcı cavab vermək niyyəti ilə bağlı bəyanatına görə "qeyri-normal insan" adlandırıb. Şimali Koreya lideri vurğulayıb ki, nüvə dövlətinə qarşı bu cür hədələr "son dərəcə axmaqlıq və düşüncəsizlik" təzahürüdür.
Qeyd edək ki, Koreya yarımadasında gərginlik oktyabrın 1-də, Hərbi Gündə Cənubi Koreyanın yeni "Hyunmoo-5" ballistik raketini nümayiş etdirməsindən sonra kəskin şəkildə artıb.
Şimali Koreya lideri, həmçinin qeyd edib ki, bu bəyanatlar və hərəkətlər regionda təhlükəsizliyi kimin təhdid etdiyini göstərir.
"Əgər düşmən son dərəcə axmaqlıq və düşüncəsizliyə qapılaraq KXDR-in suverenliyinə təcavüz etmək üçün silahlı qüvvələrdən istifadə etməyə cəhd göstərərsə, Pxenyan tərəddüd etmədən nüvə silahı da daxil olmaqla malik olduğu bütün hücum qüvvələrindən istifadə edəcək", - deyə Kim Çen In əlavə edib.
Milli.Az
Xəbərlərimizi WhatsApp kanalımızdan da oxuyun
Digər maraqlı xəbərlər Milli.Az-ın Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin!
