"Azərbaycan haqda maraqlı şeylər öyrənmişəm"

Titullarına görə dünya voleybolunun bir nömrəsi hesab olunun Braziliya millisinin üzvü Şeyla Kastro Apasport.az saytına müsahibə verib. 2 dəfə olimpiya, 4 dəfə Qran-Pri və Cənubi Amerika kubokunun, Panamerika kubokunun, İtaliya və Braziliya çempionatlarının qalibi, "Sollis Nestle"nin heyətində klublararası dünya çempionatının qızıl mükafatçısı, həmçinin ən dəyərli (MVP) və ən yaxşı hücumçu olan 29 yaşlı idmançı Azərbaycan barədə sualları həvəslə cavablandırıb. O, Super Liqanın gücünün bütün dünyaya səs saldığını deyərək, Azərbaycanda oynamaq istədiyi komandanın adını da açıqlayıb.

- Azərbaycan voleybolu barədə hansı bilgilərə maliksiz?

- İnternet vasitəsilə müxtəlif ölkələrin çempionatlarını izləyirik. Buraya Azərbaycan Super Liqası da daxildir. Bilirik ki, klublarınızın heyətində kifayət qədər ulduz voleybolçular var, avrokuboklarda yaxşı çıxış edirlər. Bundan əlavə, yaxın dostum Ancelo Vercesi bu ölkədə "Bakı" klubunu çalışdırıb. O da Azərbaycan haqda yalnız xoş sözlər deyib. Vercesidən də ölkəniz barədə bir sıra maraqlı şeyləri öyrənmişəm.

- Mövsüm öncəsi mətbuatın gündəmində əsas yeri Azərbaycana gəlmək ehtimalınızın olması barədə xəbərlər tuturdu. Siz də ölkəmizdən təklif aldığınızı demişdiz. Transferin niyə baş tutmamasını və həmin klubun adını açıqlaya bilərsizmi?

- Bu barədə nəsə demək istəmirəm. Hazırda "Sollis Nestle"dəyəm və öz durumumdan çox məmnunam. Bəlkə növbəti ildə belə təklif olarsa, düşünməyə dəyər. Ancaq yenə də əvvəlcədən dəqiq heç nə deyə bilmərəm. Hazırda dünya çempionlarının heyətindəyəm və bu, mənim üçün həm daha xoş, həm də daha cəlbedicidir.

- Özünüz Azərbaycanda hansı komandanın şərəfini qorumaq istərdiz?

- Mundialdan sonra "Rabitə"ni daha yaxşı tanıdım və onlar Çempionlar Liqasında mübarizə aparacaqlar. Məsələn, dəvət olsa, bu klubda oynaya bilərəm. Fikrimcə, Azərbaycanın ən yaxşı komandası da "Rabitə"dir.

- Bəs klublararası dünya çempionatının finalında qalib gəldiyiniz "Rabitə" ilə oyunu necə şərh edərdiz?

- Sözün düzü, həlledici qarşılaşmanın belə alınacağını gözləmirdik. "Rabitə"nin daha yaxşı oynayacağı qənaətindəyik. Oyunun gedişi isə göstərdi ki, ən yaxşı voleybolçularınızın blokunu yara, hücumçularınızın həmlələrinin qarşısını ala bildik.

- Amma qrup mərhələsinin ilk görüşündə ikinci setdə oyunun gedişini xeyrinizə dəyişdiz. Həmin matçla müqayisədə finalda belə gözəl oynamağınızın sirri nədə idi?

- Biz birinci görüşdə onları yaxşı tanımırdıq. Bu, ilk setdə də özünü göstərdi. Lakin sonra "Rabitə"nin oyununu "oxuyaraq", lazımı taktika qurduq. Həmin qarşılaşmadan fərqli, həlledici matçda artıq rəqib barədə tam məlumatlı idik. Yekunda bu da asan qələbə qazanmağımıza səbəb oldu.

Milli.Az