Su kanalları təmir olunur - VİDEO

Ağsu Maşın Qolu kanalına beton üzlük vurulur, qurğuları sazlanır

Milli.Az Real TV-ə istinadən bildirir ki, "Durduğumuz bu kanal Yuxarı Şirvan kanalının Ağsu Maşın Qolu kanalıdır. Bu kanal 1980-cı ildən istifadəyə verilib. Gördüyünüz kimi kanalın müəyyən yerləri çox yararsız hala düşmüş, beton örtüyü erroziyaya uğramışdı. Hər il bu kanalda əsaslı və cari təmir işləri aparılır. Hazırda bu ərazidə beton üzlük vurulur, qurğular təmir olunur".

Bunu Meliorasiya və Su Təsərrüfatı ASC-nin nümayəndəsi Əlibala Ağayev deyib.

35.6 kilometr uzunluğunda olan bu kanal rayonun 37071 hektar ərazisinin suvarılmasına xidmət edən əsas su mənbəyi hesab olunur.

Yay dövründə, su olmayan müddətdə Yuxarı Şirvan kanalından nasoslar vasitəsi ilə kanala su verilir və əkin sahələrinin su təminatı yaxşılaşdırılır.

Bu il kanalda 1600 metr əsaslı təmir nəzərdə tutulur. Kanalın 4 kilometrlik hissəsi artıq ötən il təmir olunub. Hazırda suvarma getmədiyi üçün maşın qolu kanalı təmirə dayanıb. Suvarmaya ehtiyac olan ərazilərə isə çaylardan su verilir.

"Rayon ərazisində 967 kilometr uzunluğunda suvarma kanalları var. Kanalların 62 kilometri beton üzlüklü, 148 kilometr hissəsi magistral, 872 kilometr torpaq kanallardır. Bu kanallardan beton örtüklü, borulu kanallarımız var. Biz çalışırıq ki, təmir işlərində əsasən torpaq kanalları beton örtüklü edək. Çünki, su itkisinin qarşısı alınır, gələcəkdə suya olan tələbatı yaxşı təmin etmək üçün biz kanallarda beton üzlüyü gücləndiririk ki, beton üzlüklü kanalların sayı daha çox olsun..." - Əlibala Ağayev bildirib.

Rayonda ən çox taxıl, qarğıdalı və yem bitkiləri əkilir. Son illər rayonda bağçılıq təsərrüfatları da inkişaf etdirilməkdədir.

Ağsuda suvarma sahəsində görülən işlərlə yanaşı, rayon ərazisindən axan və zaman-zaman yaşayış məntəqələrinə, o cümlədən əkin sahələrinə sel təhlükəsi yaradan çaylar da nəzarətdə saxlanılır. Ağsu şəhərinin mərkəzindən axan eyniadlı çayda daş-beton bəndlər tikilib.Qabaqlayıcı tədbirlər gələcəkdə də davam edəcək.

Qeyd edək ki, Azərbaycan Respublikasının Prezidenti İlham Əliyev Zaur Mikayılovu Azərbaycan Meliorasiya və Su Təsərrüfatı Açıq Səhmdar Cəmiyyətinin sədri vəzifəsinə təyin olunması ilə əlaqədar videoformatda qəbul edərkən kanalların təmiri və yenidən qurulmasının önəmli vəzifələrdən biri olduğunu söyləyib. Sovet vaxtında çəkilmiş kanalların böyük əksəriyyətinin torpaq kanallar olduğunu və onların böyük hissəsinin bu gün də fəaliyyətdə olmasını bildirib.

Milli.Az