Cəmiyyət

Yol kənarlarındakı istifadəsiz məkanlar - Dövlət vəsaiti hesabına tikilən obyektlərə niyə sahib çıxan yoxdur? - VİDEO

7 Aprel 2021 11:34
Baxış: 637

Yol kənarlarında ''dayan-dincəl'' məkanı var, amma sürücü və sərnişinlər bundan istifadə edə bilmirlər.

Milli.Az xezerxeber.az-a istinadən bildirir ki, yeni Ələt-Astara magistralının Salyan rayonundan keçən hissəsində belə bir məkan var.

Avtomagistralın inşası cənub bölgəsinə üz tutan sərnişinlərin rahatlığını təmin etmək üçün nəzərdə tutulub. Amma bu yolun rahatlığını pozan yol boyu istirahət yerlərinin olmamasıdır. Daha doğrusu, istirahət yerləri var, amma istifadəyə verilməyib.

Avtomagistralın Cəlilabaddan keçən hissəsində də vəziyyət eynidir.

Sürücülər deyirlər ki, istirahət yerlərinin olmaması üçün mənzil başına birbaşa getməli olurlar.

Xatırladaq ki, ''Yol Hərəkətinin Təhlükəsizliyinə dair 2019-2023-cü illər üçün Dövlət Proqramı''nda avtomagistralların kənarında pitstopların tikilməsi nəzərdə tutulub. Bu layihələrin icrasına ötən ildən başlanıb. İlkin mərhələdə bu tip dayanacaqlar Gürcüstan, Rusiya və İran istiqamətlərindəki yollarda inşa edilib. Növbəti mərhələlərdə isə turistik istiqamət olan Qəbələ yolu üzərində tikiləcək. Sözügedən pitstopların sayı ümumilikdə 50 ədəd olacaq və bu məkanlarda istirahət, qidalanma və turistik məlumatlandırma yerləri nəzərdə tutulub.

Layihəni Azərbaycanda Latviyanın özəl memarlıq şirkəti həyata keçirir. Amma bunlara nəzarət edəcək qurum yoxdur. Nə Nəqliyyat, Rabitə və Yüksək Texnalogiyalar Nazirliyi, nə Dövlət Avtomobil Nəqliyyatı Xidməti, nə də Avtomobil Yolları Dövlət Agentliyi bu "dayan-dincəl" məkanlarına sahib çıxdı.

Bu qurumların mətbuat katibləri "Xəzər Xəbər"ə açıqlamalarında bildirdilər ki, həmin ''dayan-dincəl'' məkanları onların tabeliyində deyil. Onda sual yaranır: Bəs dövlətin iri layihəsinin tərkib hissəsi olan bu məkanlara kim cavabdehdir?

Mövzu ilə bağlı daha ətraflı videomaterialı təqdim edirik:

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.