Cəmiyyət

Gəncədə qarın törətdiyi fəsadlar aradan qaldırılır - FOTO

18 Fevral 2021 16:13

Baxış: 956

VTB-də minimal faiz dərəcəsi ilə nağd kredit 9.9%-dən

#GƏNCƏ

Ötən gün axşam saat 18:00 radələrindən başlayaraq Gəncəyə yağan güclü qar bir sıra fəsadlar törədib.

Milli.Az xəbər verir ki, bu barədə Trend-ə Gəncə Şəhər İcra Hakimiyyətindən məlumat verilib. Məlumatda bildirilir ki, şəhərin bir sıra ərazilərinə elektrik enerjisinin verilişində fasilələr yaranıb, yağan qarın ağırlığına dözməyən ağac budaqları sınıb: "Gəncə Şəhər İcra Hakimiyyəti yanında Fövqəladə Hallar Komissiyası gücləndirilmiş iş rejimində çalışır. Axşam saatlarından başlayaraq, daxil olmuş məlumatlar əsasında qırılan ağac budaqları ərazilərdən yığışdılır, yollara qum-duz qarışığı səpilir, səkilər və piyada keçidləri qardan təmizlənir. İşlərə Gəncə Şəhər Mənzil Kommunal Təsərrüfatı İstehsalat Birliyinin xeyli sayda işçi qüvvəsi və texnikası cəlb olunub".

Gəncə şəhər İcra Hakimiyyətinin MKTİB-nin rəis müavini Elşad Əsgərov Trend-ə bildirib ki, yağan qar ciddi fəsadlara yol açmayıb: "Səhər saat 06.00-dan başlayaraq şəhərin əsas küçə və prospektlərində, habelə Gəncəçay üzərində olan 5 körpüdəki avtomobil yollarına 30 tona yaxın qum-duz qarışığı səpilib. Qırılan ağac budaqlarının ərazilərdən yığışdırılması üçün 6 ədəd texnika ayrılıb və hazırda bu istiqamətdə işlər davam edir. Bununla yanaşı yerüstü piyada keçidləri qardan təmizlənir. Yol kənarına toplanan qar da ayrılan 2 traktor və 6 avtomobil vasitəsilə ərazidən daşınır.

Yağan güclü qar, həmçinin Gəncənin bir sıra ərazilərini işıqsız qoyub. "Azərişıq" ASC-nin Qərb Regional İdarəsinin əməkdaşları gecə saatlarından başlayaraq yaranmış fəsadların aradan qaldırılması istiqamətində iş aparırlar. Gecə və səhər saatlarında şəhərin bir çox ərazisində elektrik enerjisinin verilişi bərpa olunub. Hazırda işlər davam etdirilir".

Milli.Az