Türkiyə Ermənistanı Azərbaycana dost ölkə olmağa çağırıb

Milli.Az xəbər portalı BBC-yə istinadən xəbər verir ki, Əhməd Davutoğlu bu bəyanatı Strasburqda Avropa Şurası Parlament Assambleyasının qış sessiyasının toplantısında verib.

O, qeyd edib ki, Ermənistan ətrafında dost ölkə görmək istəyirsə, Azərbaycanı da dost qismində görməlidir.

"Ermənistan bu gün Avropa Şurasına üzv olan bir ölkənin torpaqlarının 20 faizini işğal edib. Deməli, təşkilatın əsas dəyərləri pozulub" - deyib nazir.

Türkiyənin xarici işlər naziri Əhməd Davutoğlu dünən Strasburqda bu bəyanatla çıxış edib.

Əhməd Davutoğlu Avropa Şurasının Parlament Assambleyasının qış sessiyasındakı çıxışının ardından Ermənistan məsələsində bu ölkədən olan parlamentarilərdən birinin sualına cavab olaraq toxunub.

Türkiyə mətbuatı nazirin bəyanatına geniş yer ayırıb.

Əhməd Davutoğlu qeyd edib ki, Türkiyə qonşuları ilə bütün məsələləri açıq şəkildə müzakirə etməyə hazırdır.

Ermənistanla münasibətlərin normallaşmasını nəzərdə tutan protokolların imzalanması bir çox məqsəd daşıyırdı.

Onun sözlərinə görə, mövcud problemlər bu normallaşmanın həyata keçirilməsinə maneələr yaratdı.

Əhməd Davutoğlu qeyd edib ki, Cənubi Qafqazda münasibətlərin normallaşması təkcə Türkiyə ilə Ermənistan arasında yox, Ermənistanla Azərbaycan arasında da münasibətlərin normallaşmasından asılıdır.

"Əgər siz Avropa Şurasının bütün dəyərlərinə hörmət etsəniz, əminəm ki, bir gün Avropanın bu hissəsində də sülh bərqərar olacaq. Belə olarsa, Azərbaycanla Ermənistan arasında da münasibətlər əsaslı şəkildə yaxşılaşar." - Türkiyənin xarici işlər naziri belə deyib.

Əhməd Davutoğlunun sözlərinə görə, Türkiyə onu əhatə edən ölkələri dost kimi görür.

Əgər Ermənistan da ətrafında dost ölkə görmək istəyirsə, Azərbaycanı da dost qismində görməlidir. Bu halda Qafqazda sülh və sabitlik bərqərar olar.

Davutoğlunun sözlərinə görə, bu, Ankaranın siyasi məqsədidir.

Milli.Az