Aşura günü qeyri-iş günü olsunmu?

Nazirlər Kabinetinin mətbuat xidmətinin rəhbəri Akif Əli: "Nazirlər Kabinetində belə bir məsələ müzakirə olunmur"

Hər il Məhərrəm ayının 10-cu günü müsəlman dünyasında "Aşura günü" kimi qeyd olunur. Həmin gün Azərbaycanda da inanclı insanlar 14 əsr əvvəl İslam Peyğəmbərinin nəvəsi İmam Hüseynin Yezid tərəfindən qətlə yetirilməsinə matəm saxlayırlar. Məscidlərə, ziyarətgahlara üz tutan müsəlmanlar şəhidlərin ruhuna dualar oxuyur, ehsanlar paylayır və əzadarlıq edirlər.

Həmin gün insanların ibadətinə çətinlik yaradan məqamlardan biri də Aşura gününə təsadüf edən günün iş günü olması və insanların işə yoxsa, məscidlərə getmək kimi bir seçim qarşısında qalmasıdır. Bu günün dövlət tərəfindən qeyri-iş günü elan olunması ilə bağlı uzun illərdir ki, təkliflər səslənsə də, hələlik bu reallaşmayıb. Ancaq "Aşura günü" əksəriyyəti inanclı olan insanlar uzun illərdən bəri davam edən ənənəyə sadiq qalaraq, işə getmir və hər kəs öz imanından asılı olaraq, əza saxlayır.

"Aşura günü" gününün qeyri-iş günü olması məsələsinə münasibət bildirən "Yeni Müsavat" qəzetinin dini mövzuda yazarı Kənan Rövşənoğlu deyir ki, faktiki olaraq, Azərbaycanda Aşura günü yüz illərdir ki, qeyri-iş günü kimi qeyd olunur: "Həmin gün əksər müsəlmanlar, demək olar ki, işləmir, ziyarətgahlara, məscidlərə gedirlər. Sadəcə, bu günü qeyri-iş günü kimi rəsmiləşdirmək lazımdır. Mən özüm hər zaman bunu müşahidə etmişəm ki, istər bölgələrdə, istərsə də Bakıda Aşura günündə günortaya kimi insanlar işləmirlər. Təbii ki, məcburi iş yerləri var ki, onların fəaliyyətinin dayandırılması mümkün deyil. Ancaq ümumilikdə, Aşura günü xalqın istəyi ilə rəsmi olaraq, qeyri-iş günü elan olunmalıdır".

İlahiyyatçı hacı İlqar İbrahimoğlu isə deyir ki, illərdir ki, bu təşəbbüslə çıxış edirlər: "Qəti olaraq əminik ki, ölkədə bu gün əvvəl-axır qeyri-iş günü olacaq. Xalq öz daxilindən gələn Allah Rəsuluna (s) və onun pak Əhlibeytinə (ə) olan sevgisini əsrlər boyu yaşadıb. Əhlibeyti (ə) sevmək həm də müqəddəs Quranın tələbidir.

Aşura günü Kərbəla çölündə Həzrət İmam Hüseyn (ə) şəhid qanı ilə İslamı qiyamət gününə qədər sığortalayıb. Bizlər Məhərrəm - Səfər əyyamını yaşatmaqla İslamın diriliyini yaşadırıq. Bu mənada Aşura gününün qeyri-iş günü olması labüddür. Çünki xalqımız həmin günü hətta sovet dövründə də bütün maneələrə baxmayaraq, yaşadıb.

Qarabağımızın azadlığı da bu şəhidlik məktəbinin yaşadılmasından keçir. Şəhid Mübarizlərin yetişməsindən keçir. O gün olsun ki, Aşuranı Şuşada keçirdək, İnşallah".

Azərbaycan Xalq Partiyasının sədri Pənah Hüseyn də "Yeni Müsavat"a açıqlamasında bildirib ki, hələ illər öncə Milli Məclisin deputatı olarkən bu məsələni qaldırıb: "İnanclı insanların rahat şəkildə ibadət edə bilməsi üçün şərait yaradılmalıdır və bu, dövlətin vəzifəsidir. Müxtəlif ölkələrdə, hətta Avropa ölkələrinin bəzilərində bu gün qeyri-iş günü kimi qeyd olunur və müsəlmanlar nəzərə alınır. Azərbaycanda isə Aşura günündə yüzminlərlə insan məscidlərə, ziyarətgahlara axışır. Bu çoxluğu nəzərə alaraq, Aşura gününü qeyri-iş günü elan etmək, həmin insanların hüquqlarının təminatı baxımından da məqsədəuyğun olardı. Dindar olmayan insanlar da bu məsələdə inanclılara hörmət edərək, bunu qəbul etməlidirlər. Söhbət bu günün dövlət səviyyəsində qeyd edilməsindən getmir, qeyri-iş günü olmasında gedir. Aşura günü Azərbaycanda keçirilməsinə görə ən kütləvi mərasimdir, bu təklif mütləq nəzərə alınmalıdır.

Nazirlər Kabinetinin mətbuat xidmətinin rəhbəri Akif Əli isə bildirdi ki, hazırda onlara belə bir təklif daxil olmayıb və bu məsələ müzakirə mövzusu deyil:

"Nazirlər Kabinetində belə bir məsələ müzakirə olunmur və belə bir təklif də yoxdur".

"Yeni Müsavat"