Leyla Yunus azadlıqda, bəs polisin papağı?

Hüquq müdafiəçisi Leyla Yunus bu gün sərbəst buraxılıb. Lakin hüquq müdafiəçisi dünən saxlanılan zaman polis əməkdaşlarına qarşı qeyri-etik hərəkətlər etdi, onlara müqavimət göstərdi, hətta polis zabitinin papağını başından götürüb atdı. L.Yunusun bu əməli ilə bağlı hansısa tədbir görülə bilərmi?

Millət vəkili Zahir Oruc hesab edir ki, polisə qarşı edilmiş hərəkətlə bağlı qərarı hüquq-mühafizə orqanının ekspertizası verməlidir. Millət vəkili Milli.Az-a açıqlamasında bildirdi ki, KİV-in yayımladığı səhnələr büsbütün teatral isterika ilə doludur. Açıq şəkildə sanki polis orqanı əməkdaşlarını təxribata çəkmək, onları aşağılamaq, özünü məzlum qiyafəsində göstərmək, total hücumun hədəfində olduğunu bəyan etmək və yəqin ki bunu da növbəti layihələrinin predmetinə çevirmək niyyəti idi.

"Düşünmürəm ki, o, bu rolu uğurla ifa etdi. Görünür, o, özünün toxunulmazlığına, müxtəlif maliyyə dairələrindən aldığı mükafatlara o qədər aludə olub ki, düşünüb ki, hər hansı sorğu-suallardan kənardadır. Leyla Yunusa olan bütün yatırımlar Azərbaycanın əleyhinə olan fəaliyyətindən qaynaqlanır. Heç kim onun milli-etnik mənşəyini araşdırmaq niyyətində deyil. Bu, demokratik cəmiyyətlər üçün uyarlı sayıla bilməz. Biz Ermənistanı monomillət olmasına görə ittiham edirik və haqlıyıq. Hətta Azərbaycanda ermənilərin yaşama imkanlarını tanıdığımızı söyləyirik. Ancaq mənəviyyat ermənisi olmaq, əqidə erməniliyi təhlükəlidir. Leyla Yunus mənəviyyat ermənisidir. Bunun üçün onun fəaliyyəti və tərcümeyi halını göz önünə gətirmək kifayətdir. Onun hərəkətləri milli maraqlara təhlükə kimi görünməkdədir. Bizim Leyla Yunusa kəskin siyasi hiddət və narazılığımız var", - Z.Oruc dedi.

Milliət vəklinin fikrincə, L.Yunusun polisə qarşı əməli barədə nə tədbir görüləcəyi polis qüvvələrinin iddiası və müraciəti əsasında baş verə bilər.

Şəhər Baş Polis İdarəsinin rəis müavini, polis general-mayoru Səhlab Bağırov Milli.Az-a bildirdi ki, bu məsələ onun xidmət sahəsinə aid deyil. Lakin həmin işə cəlb olunmuş polis idarəsi tədbir görə bilər.

Anar Məmmədov
Milli.Az