Bakıda taksi sürücüləri "əlavə sərnişin" pulunu necə qazanırlar?

Milli.Az Day.Az-a istinadən bildirir ki, oxucumuz Nailə Quliyeva 189 taksi xidməti servisindən narazı qalıb.

O, redaksiyaya yolladığı məktubunda yazıb: "Dünən 189 taksi xidməti ilə bağlı daha bir şok yaşadıq. Maşında kondisioner üçün əlavə olaraq 1,4 manat, 1 nəfər əlavə adam daşımaq üçün 2 manat istədilər. Etirazımızı bildirəndə operator dedi ki, sürücü hüquqlarını qoruyur. Hansı hüquqları?! Sürücüyə yolu göstəririksə, nə üçün ondan naviqator xidməti üçün pul istəmədik?! Gülməli, utanmalı durumdur. Belə şirkətlərin uydurduqları qaydalara nə qədər dözmək olar?"

189 taksi çağırışı xidmətinin operatoru bildirdi ki, onların şirkəti ekonom və biznes klaslı avtomobillər təklif edir.

"Biznes klaslı taksinin çağırışı ekonom klaslı taksi çağırışından bahadır. Bizə müştəri zəng vuranda gediş haqqını sifariş zamanı deyirik. Qiymət yalnız telefonla razılaşdırılır. Sürücünün kondisionerə görə müştəridən əlavə məbləğ tələb etmək hüququ yoxdur.

Belə fakt varsa, araşdırmağa hazırıq. Əlavə sərnişinin daşınmsı üçün gediş haqqı qismində 2 manat alınmasına gəldikdə isə bildirmək istərdim ki, qanuna görə, minik avtomobilində 4 sərnişinin daşınmasına icazə verilib. 5 və daha artıq sərnişinin daşınmasına görə sürücülər müəyyən cəriməyə məruz qalırlar.

Ona görə də sürücü bir əlavə sərnişin üçün 2 manat istəyir və bütün məsuliyyəti öz üzərinə götürür. Lakin sürücü 5 və daha artıq sərnişin daşımaqdan imtina edə bilər. Bu, onun hüququdur", - 189 xidmətindən bildirdilər.

Bakı Baş Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov isə bildirdi ki, avtomobildə əlavə sərnişinin daşınması yolverilməzdir: "Belə sürücülərin hərəkətləri sərnişin daşınması qaydalarının pozulmasıdır.

Əlavə sərnişinin daşınması üçün sürücü məsuliyət daşıyır. Əgər taksi sürücüsü əlavə sərnişin üçün əlavə pul istəyirsə, bu, doğru deyil. İnzibati Xətalar Məcəlləsinin 151.2 maddəsinə görə, sərnişin daşınması qaydalarının pozulmasına görə sürücü 60 manat, üstəgəl 3 balla cərimələnir. Minik avtomobilində sərnişinlərin daşınmsı oturacaqların sayına müvafiq aparılmalıdır".

Milli.Az